សាហាវបំផុត ! ចេះតែលើកដៃកាប់សម្លាប់ប្អូនថ្លៃទៅរួច
26/11/2017
ខេត្តបាត់ដំបង ៖ ព័ត៌មានដែលទទួលបានពីសមត្ថកិច្ចបានឲ្យដឹងថា បុរសម្នាក់ត្រូវបានឃាត់ខ្លួនភ្លាមៗ ក្រោយពីយកពូថៅកាប់ប្អូនថ្លៃដាច់ក ស្លាប់នៅក្រោមផ្ទះ កាលពីវេលាម៉ោង២និង៣០នាទីរសៀល ថ្ងៃទី២៦វិច្ឆិកា ដែលស្ថិតនៅភូមិជ័យជម្នះ ឃុំបឹងប្រាំ ស្រុកបវេល។
ប្រភពដដែលបានឲ្យដឹងថា ជនដៃដល់ឈ្មោះហៀង វណ្ណា អាយុ២៨ឆ្នាំ រីឯជនរងគ្រោះឈ្មោះ យុង តុណា ភេទប្រុស អាយុ២២ឆ្នាំ ដែលត្រូវជាប្អូនថ្លៃជនដៃដល់ ហើយពួកគេរស់នៅក្នុងភូមិ ឃុំកើតហេតុជាមួយគ្នាខាងលើ។ បើតាមសមត្ថកិច្ចបានប្រាប់ថា ជនដៃដល់បានទាញពូថៅកាប់ទៅលើប្អូនថ្លៃរបស់ខ្លួន ខណៈគេកំពុងដេកលក់នៅលើគ្រែក្រោមផ្ទះ ដោយកាប់ជាច្រើនពូថៅរហូតដាច់ក ស្លាប់យ៉ាងរន្ធត់តែម្ដង។
បើតាមការស្រង់ចម្លើយបឋមរបស់ជនដៃដល់បានសារភាពថា ខ្លួនពិតជាបានសម្លាប់ប្អូនថ្លៃនេះមែន ដោយសារតែប្អូនថ្លៃរូបនេះជាមនុស្សញៀនថ្នាំ និងស្រវឹងស្រាជាប្រចាំ ហើយថែមទាំងបង្កជម្លោះរហូតគម្រាមរកសម្លាប់ឪពុកក្មេក ដែលត្រូវជាឪពុករបស់ខ្លួន(ជនសង្ស័យ)ចោលទៀត ដូច្នេះទើបធ្វើឲ្យខ្លួនទ្រាំមិនបានក៏ទាញពូថៅសម្លាប់មុនទៅ។ ទោះជាយ៉ាងណាជនសង្ស័យឈ្មោះ ហៀង វណ្ណា ត្រូវបានសមត្ថកិច្ចឃាត់ខ្លួនហើយ មន្ត្រីជំនាញបានសួរនាំ ដើម្បីកសាងសំណុំរឿងបញ្ជូនទៅតុលាការ៕
