រាជធានីភ្នំពេញ ៖ ថ្ងៃទី១នៃព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក ឆ្នាំ២០១៧ នេះមានប្រជាពលរដ្ឋចូលរួមកម្សាន្តប្រហាក់ប្រហែលនឹងឆ្នាំមុន គឺមានចន្លោះ៥០ទៅ៦០ម៉ឺននាក់ បើយោងតាមរបាយការណ៍របស់អគ្គស្នងការដ្ឋាននគរបាលជាតិ ។
ក្នុងថ្ងៃទី១នេះមានបទល្មើស លួច១/៣លើក (ថយចុះ ២លើក) បណ្ដាលឲ្យបាត់ទូរស័ព្ទ១គ្រឿង, គ្រោះថ្នាក់ផ្សេងៗកើតឡើង ១៤/៥លើក ក្នុងនោះមាន ផ្ទុះកំប៉ុងហ្គាស១លើក របួស៣នាក់(ក្មេងម្នាក់), វង្វេងម្ដាយ៣លើក, លិចទូក១០/២លើក កត់សម្គាល់ ដោយឆ្នាំនេះខ្យល់ និងរលកខ្លាំងបណ្ដាលឲ្យការលិចទូកមានកំណើន៨លើក ប៉ុន្តែពុំមានគ្រោះថ្នាក់ដល់អាយុជីវិតមនុស្សឡើយ ។ រីឯការជួយសង្គ្រោះពិនិត្យ និងព្យាបាលជម្ងឺ១៩២៣នាក់ (ស្រី៣៨៩នាក់) ក្នុងនោះសង្គ្រោះបឋម ១៤៨នាក់, សង្គ្រោះដោយគ្រោះថ្នាក់ចរាចរណ៍២នាក់ និងបញ្ជូនទៅមន្ទីរពេទ្យ៣នាក់(ស្រី២នាក់) ។
គួរបញ្ជាក់ដែរថា ព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក ឆ្នាំ២០១៧ នេះប្រព្រឹត្តទៅរយៈពេល ៣ថ្ងៃគឺថ្ងៃ ១៤-១៥កើត និង១រោច ខែកក្ដិត ឆ្នាំរកា នព្វស័ក ព.ស ២៥៦១ គ.ស ២០១៧ ត្រូវនឹងថ្ងៃទី ០២-០៣-០៤ ខែវិច្ឆិកា ឆ្នាំ២០១៧ ដែលមានទូកចូលរួមប្រកួត២៧០ទូក (ទូកអន្តរជាតិ៧៨ ទូកស្រី៣ទូក) ក្នុងនោះទូកអុំ ១៦៤ទូក (ស្រី១ទូក), ទូកចែវ ២៨ទូក (ស្រី ២ទូក), ចំណុះទូកសរុប ១៧.៨៦៧នាក់ (ស្រី ២២០នាក់) ៕