ក្នុងប្រតិបត្តិការវះកាត់ ១៨ម៉ោងលើសាកសពនេះ ក្រុមវេជ្ជបណ្ឌិតបានតភ្ជាប់ឆ្អឹងខ្នង សរសៃប្រសាទ និងសរសៃឈាមនៃមនុស្ស ២នាក់ បានដោយជោគជ័យតាមរយៈ ការធ្វើតេស្ត។ វេជ្ជបណ្ឌិតជនជាតិអ៊ីតាលី Sergio Canavero ដែលជាអ្នកជំនាញផ្នែកវះកាត់ បានបញ្ជាក់ថា បន្ទាប់ពីជោគជ័យនេះ ក្រុមរបស់លោកនឹងអនុវត្តការវះកាត់លើមនុស្សរស់ដែលរាងកាយលែងដំណើរការចាប់ពី ក ចុះក្រោម។
វេជ្ជបណ្ឌិត Sergio Canavero
ទោះបីមានការប្រកាសបែបនេះក្ដី ប៉ុន្តែក្រុមអ្នកវះកាត់ មិនបានផ្ដល់ភស្តុតាងណាមួយ ដើម្បីគាំទ្រទៅលើការប្រកាសនោះឡើយ ដោយបញ្ជាក់ថានឹងបញ្ចេញនាពេលឆាប់ៗខាងមុខ។ ក្រុមរបស់វេជ្ជបណ្ឌិត Sergio Canavero ក៏ធ្លាប់អះអាងផងដែរពីការវះកាត់ប្ដូរក្បាលលើសត្វស្វា និងកណ្ដុរដោយជោគជ័យកាលពីឆ្នាំមុន។វេជ្ជបណ្ឌិត Sergio Canavero បានល្បីឈ្មោះយ៉ាងខ្លាំង ក្រោយប្រកាសពីគម្រោងវះកាត់ប្ដូរក្បាលមនុស្ស។ អ្នកវិទ្យាសាស្ត្រ និងមនុស្សជាច្រើននៅលើពិភពលោក បានច្រានចោលគំនិតនេះ ហើយគិតថាលោកមានបញ្ហាទៀតផង។ ក្រោយមក ស្រាប់តែមានជនជាតិរុស្សីម្នាក់ ដែលលែងដំណើរផ្នែកខាងក្រោមឈ្មោះ Valery Spiridinov បានចុះកិច្ចសន្យាធ្វើជាអ្នកស្ម័គ្រចិត្តឲ្យវះកាត់ប្ដូរក្បាលដំបូងគេ។ ចំណែកពេលវេលានៃការវះកាត់ទៅលើមនុស្សរស់ នៅមិនទាន់បញ្ជាក់ទេ៕
លោក Valery Spiridinov
ប្រភព៖ Independent