រាជធានីភ្នំពេញ ៖ យុវជនម្នាក់ក្នុងចំណោមបក្សពួក៥នាក់ បានធ្វើសកម្មភាពលូកលាន់លើនារីម្នាក់ ធ្វើឲ្យនាងប្រកាន់ភ្លាមស្រែកឆោឡោឲ្យគេជួយ ផ្អើលដល់ប្រជាពលរដ្ឋនាំគ្នាឃាត់ខ្លួនបានជនសង្ស័យម្នាក់ ក្នុងចំណោមបក្សពួកទាំងអស់ដែលស្ដ្រីរូបនោះចោទថា បានលូកចាប់សុដន់របស់នាង ដែលជាការប្រមាថមាក់ងាយដ៏ធ្ងន់ធ្ងរ។ ហេតុការណ៍នេះកើតឡើង កាលពីវេលាម៉ោង៩យប់ថ្ងៃទី១៤ វិច្ឆិកា ផ្លូវបេតុង នៅជាប់ក្លឹបស៊ីធី ក្នុងភូមិដំណាក់ធំ សង្កាត់ស្ទឹងមានជ័យ២ ខណ្ឌមានជ័យ ។
ជនសង្ស័យមានឈ្មោះ ឆុន ចយ ភេទប្រុស អាយុ២០ឆ្នាំ មុខរបរមិនពិតប្រាកដ មានស្រុកកំណើតនៅឃុំព្រៃឈរ ស្រុកកំពង់ត្របែក ខេត្ដព្រៃវែង ។ ចំណែកស្ដ្រីរងគ្រោះមានឈ្មោះមាស ចាន់នី អាយុ២០ឆ្នាំ មុខរបរលក់ប្រហិត ស្នាក់នៅភូមិដំណាក់ធំ សង្កាត់ស្ទឹងមានជ័យ២ ខណ្ឌមានជ័យ មានស្រុកកំណើតភូមិព្រៃកប្បាស ស្រុកព្រៃកប្បាស ខេត្តតាកែវ ។
បើតាមសម្ដីនារីរងគ្រោះបានប្រាប់អោយដឹងថា មុនពេលកើតហេតុរូបនាងបានដើរចូលទៅផ្ទះដើម្បីយកប្រហិតមកលក់ ដោយដើរចូលតាមផ្លូវតូចមួយនៅជាប់និងរបងក្លឹបស៊ីធី ។ នាងថា ស្រាប់តែពេលដើរចូលទៅដល់កន្លែងងងឹត ក៏លេចមុខជនសង្ស័យ៤ទៅ៥នាក់ ចេញមកធ្វើសកម្មភាពចាប់ទាញដៃនាងរួចចាប់សុដន់ ធ្វើអោយនាងភ័យស្លន់ស្លោបានស្រែកឆោឡោ បង្កការភ្ញាក់ផ្អើលឈុលឡើងដល់អ្នកដែលនៅក្បែរនោះ ចេញមកជួយចាប់បានជនដៃម៉ឹកម្នាក់ និងស្វាគមន៍មួយដៃមួយជើង បណ្ដាលឲ្យបែកមុខបែកមាត់ហើមកក្លាក់ ភ្លាមៗនោះសមត្ថកិច្ចមូលដ្ឋានបានចុះទៅដល់កន្លែងកើតហេតុ និងនាំជនម្នាក់នោះ ទៅសាកសួរនៅប៉ុស្ដិ៍នគរបាលស្ទឹងមានជ័យ ។ ចំណែកបក្សពួកប៉ុន្មាននាក់ទៀតបានរត់គេចខ្លួនបាត់អស់ ។
នៅចំពោះមុខសមត្ថកិច្ច ជនរូបនោះបាននិយាយទាំងសភាពស្រវឹងស្រាថា រូបគេមិនបានចាប់ដោះនារីម្នាក់នោះដូចការចោទប្រកាន់នោះទេ ដូចជាមិនទាន់ស្វាងនៅឡើយទេ ។ ក្រោយពេលកើតហេតុ ជនរងគ្រោះបានមកដាក់ពាក្យបណ្តឹងនៅប៉ុស្ដិ៍នគរបាលស្ទឹងមានជ័យ ដើម្បីអោយសមត្ថកិច្ចធ្វើការតាមច្បាប់។ ចំណែកជនសង្ស័យវិញ ត្រូវបានសមត្ថកិច្ច កសាងសំនុំរឿង បញ្ជូនទៅអធិការដ្ឋានខណ្ឌមានជ័យដើម្បីចាត់ការបន្ត ៕