ចាប់បានរថយន្តដឹកឈើធ្នង់ ហើយដោះលែងវិញ
16/11/2017
រាជធានីភ្នំពេញ ៖ រថយន្តម៉ាកកាមរីគូទហើម២គ្រឿងត្រូវកម្លាំងសមត្ថកិច្ចចំរុះរបស់សាលាខណ្ឌសែនសុខធ្វើការឃាត់ និងត្រួតពិនិត្យខណៈបើកឆ្លងកាត់កន្លែងសមត្ថកិច្ចដាក់គោលដៅត្រួតពិនិត្យរថយន្តហើយក៏ឃើញដឹកឈើសម្រាប់ធ្វើជាកូនក្រឡឹងតែពុំទាន់កែច្នៃ ។ ការឃាត់រថយន្តទាំង២គ្រឿងត្រួតពិនិត្យនេះបន្ទាប់ពីគណៈបញ្ជាការឯកភាពខណ្ឌសែនសុខបានដាក់គោលដៅត្រួតពិនិត្យរថយន្តដឹកអ្នដំណើរនៅពេលយប់ដើម្បីការពារសុវត្ថិភាពជួនប្រជាពលរដ្ឋក្នុងមូលដ្ឋានកាលពីវេលាម៉ោង១០និង៥៥នាទីយប់ថ្ងៃទី១៥ ខែវិច្ឆិកា ឆ្នាំ២០១៧ នៅចំណុចមុខវត្តសុវណ្ណមុនីវង្ស តាមបណ្តោយផ្លូវហាណូយ ភូមិអន្លង់ក្ងាន សង្កាត់ឃ្មួញ ខណ្ឌសែនសុខ ។
លោក សាំង សុភ័ក្រវិចិត្ត អភិបាលរងខណ្ឌសែនសុខបានប្រាប់ថា មុននឹងឃាត់រថយន្តទាំង២គ្រឿងដឹកឈើប្រភេទធ្នង់ខាងលើនេះគឺបន្ទាប់ពីគណៈបញ្ជាការឯកភាពខណ្ឌសែនសុខក្រោមការដឹកនាំពីលោក ម៉ូវ ម៉ានិត ជាអភិបាលខណ្ឌប្រជុំដាក់គោលដៅត្រួតពិនិត្យរថយន្តដឹកអ្នកដំណើរដែលធ្វើចរាចរឆ្លងកាត់ភូមិសាស្ត្រដើម្បីរក្សាសន្តិសុខសុវត្ថិភាពជួនប្រជាពលរដ្ឋ និងដើម្បីទប់ស្កាត់រាល់បទល្មើសផ្សេងៗដែលអាចកើតមានឡើង ។
នៅពេលកំពុងតែត្រួតពិនិត្យស្រាប់តែមានរថយន្ត២គ្រឿង ទី១ម៉ាកកាមរីគូទហើម ពណ៌ស ពាក់ស្លាកលេខ កំពង់ចាម ២A-០៧១៦ បើកបរដោយបុរសពីរនាក់ និងទី២ម៉ាកកាមរីគូទហើម ពណ៌ស ពាក់ស្លាកលេខ បន្ទាយមានជ័យ ២A-២៩៨៤ បើកបរដោយបុរសពីរនាក់បានបើកឆ្លងកាត់គោលដៅត្រួតពិនិត្យគួរឱ្យសង្ស័យក៏ហៅឱ្យឈប់ធ្វើការត្រួតពិនិត្យឃើញមានឈើប្រភេទធ្នង់ជាកំណាត់តូចៗដែលគេដឹកយកទៅធ្វើជាកូនក្រឡឹងនោះទើបសមត្ថកិច្ចឃាត់សាកសួរ និងរាយការណ៍ជូនលោកអភិបាលខណ្ឌ ។
បើតាមសម្តីពីអ្នកបើកបររថយន្តដឹកឈើធ្នង់បានឱ្យដឹងថា ពួកគាត់គ្រាន់តែជាអ្នកស៊ីឈ្នួលដឹកឱ្យគេតែប៉ុណ្ណោះ ដោយគិតក្នុងឈើមួយគីឡូតម្លៃ១០០០រៀល ហើយឈើខាងលើជាប្រភេទឈើក្រឡឹងដែលដឹកចេញមកពីស្រុកក្រវ៉ាញ ខេត្តពោធិ៍សាត់ នាំចូលមកក្នុងទីក្រុងភ្នំពេញ ។ ក្រោយពីរាយការជួនលោកអភិបាលខណ្ឌរួចលោក សាំង សុភ័ក្រវិចិត្ត បានប្រាប់ថា លោកអភិបាលខណ្ឌបានឱ្យរថយន្តដឹកឈើនោះបន្តដំណើរទៅមុខទៀតព្រោះលោកថា ឈើនេះជាប្រភេទកែច្នៃរួចហើយ ៕
