ឯកឧត្តម ទេសរដ្ឋមន្ត្រី អៀង មូលី ទទួលបន្ទុកបេសកកម្មពិសេស និងជាប្រធានអាជ្ញាធរជាតិប្រយុទ្ធនឹងជំងឺអេដស៍ បានថ្លែងក្នុងពិធីបើកកិច្ចប្រជុំនាព្រឹកថ្ងៃទី១៥ វិច្ឆិកានេះថា កិច្ចប្រជុំពេញអង្គ អាជ្ញាធរជាតិប្រយុទ្ធ នឹងជំងឺអេដស៍ ត្រូវបានរៀបចំឡើងជារៀងរាល់ឆមាស ដើម្បីជួបប្រជុំសមាជិក និងសមាជិការបស់អាជ្ញាធរជាតិប្រយុទ្ធ នឹងជំងឺអេដស៍ដែលជាតំណាង ពីក្រសួង-ស្ថាប័ន រដ្ឋបាលរាជធានី-ខេត្ត ដើម្បីពិនិត្យរួមគ្នាលើបច្ចុប្បន្នភាព វឌ្ឍនភាព បញ្ហាប្រឈម ការលំបាកនានា និងពិភាក្សារកដំណោះស្រាយ ។
កិច្ចប្រជុំពេញនេះបានអនុម័តនូវសេចក្តីសម្រេចចិត្តចំនួន៧ ចំណុចដូចជា បន្តស្នើសុំដាក់បញ្ចូលនៅក្នុងផែនការថវិកាជាតិប្រចាំឆ្នាំសំរាប់ការងារប្រយុទ្ធនឹងជំងឺអេដស៍របស់ក្រសួង ស្ថាប័ន រាជធានី ខេត្តនីមួយៗ។ បង្កើនសកម្មភាពអប់រំការបង្ការការឆ្លងមេរោគអេដស៍ ការជួយស្វែងរកករណីអេដស៍ថ្មី ការបញ្ជូនអ្នកផ្ទុកមេរោគអេដស៍ទៅសេវាថែទាំព្យាបាល ការសម្របសម្រួលបង្កបរិយាកាសអំណោយផលដូចចែងក្នុងគោលនយោបាយភូមិឃុំមានសុវត្ថិភាព និងការផ្តល់កញ្ចប់គាំទ្រសង្គម ដែលដាក់ក្នុងផែនការវិនិយោគ និងផែនការអភិវឌ្ឍឃុំសង្កាត់។ បន្តពង្រីកការផ្តល់អត្តសញ្ញាណកម្មគ្រួសារក្រីក្រ ដល់អ្នកផ្ទុកមេរោគអេដស៍ក្រីក្រ។
បន្តជំរុញការអនុវត្តប្រកាសស្តីពីការបង្កើតគណៈកម្មការអេដស៍នៅតាមសហគ្រាសគ្រឹះស្ថាន និងការបង្ការ ទប់ស្កាត់មេរោគអេដស៍/ជំងឺអេដស៍នៅកន្លែងធ្វើការ និងប្រកាសស្តីពីលក្ខខណ្ឌការងារ វិធានអនាម័យ និងសន្តិសុខការងារ នៃសហគ្រាស គ្រឹះស្ថាន ក្រុមហ៊ុនផ្នែកសេវាកម្សាន្តជាដើម។
នៅក្នុងអង្គប្រជុំពេញអង្គអាជ្ញាធរជាតិប្រយុទ្ធ នឹងជំងឺអេដស៍លើកទី២ឆ្នាំ២០១៧នេះ មានឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ តំណាងក្រសួង-ស្ថាប័ន ឯកឧត្តម លោកជំទាវ លោក លោកស្រីអភិបាលរងរាជធានី-ខេត្ត និងជាប្រធានគណៈកម្មាធិការអេដស៍ស្ថាប័ន ក្រសួង និង រដ្ឋបាលរាជធានី-ខេត្ត និង ឯកឧត្តម លោកជំទាវ លោក លោកស្រី ជាប្រធានលេខាធិការដ្ឋាន គណៈកម្មាធិការអេដស៍ លោក លោកស្រី ជាតំណាងអង្គការដៃគូរអភិវឌ្ឍ តំណាងម្ចាស់ជំនួយផងដែរ៕
