ស្ត្រីដែលស្លាប់មានឈ្មោះ ង្វៀង ធីប៊ែ អាយុ ៨០ឆ្នាំ ជនជាតិវៀតណាម មុខរបរ នៅផ្ទះ បច្ចុប្បន្នស្នាក់នៅផ្ទះជួល ភូមិដើមខ្វិត សង្កាត់ទួលសង្កែ១ ខណ្ឌឫស្សីកែវ។
ប្រភពព័ត៌មានពីសាក្សីដែលឃើញហេតុការណ៍ បានប្រាប់ឲ្យដឹងថា នៅមុនពេលកើតហេតុ គេបានឃើញស្ត្រីរងគ្រោះខាងលើដើរតែម្នាក់ឯង ដោយដើរតាមផ្លូវបេតុងក្នុងទិសដៅពីកើតទៅលិច ខណៈពេលដើរមកដល់ចំណុចមុខផ្ទះកើតហេតុខាងលើ ស្រាប់តែឃើញស្ត្រីរងគ្រោះបានដួលផ្កាប់មុខបាត់ទៅហើយ ភ្លាមៗនោះ ក៏ត្រូវបានបងប្អូនប្រជាពលរដ្ឋដែលនៅក្បែរនោះបាននាំគ្នាចេញមកជួយ ដោយអ្នកខ្លះបានជួយលើកស្ត្រីរងគ្រោះបញ្ឈអង្គុយ អ្នកខ្លះជួយចាប់ច្របាច់ គក់រិតដើមទ្រូង អ្នកខ្លះទៀតបានយកប្រេងកូឡា ក្រូចឆ្មារ និងអ្នកខ្លះទៀតបានហៅរថយន្តសង្គ្រោះបន្ទាន់មកដឹកយកទៅមន្ទីរពេទ្យ តែដោយអកុសលស្ត្រីរងគ្រោះខាងលើបានដាច់ខ្យល់ស្លាប់បាត់ទៅហើយ។
ក្រោយពេលកើតហេតុ បងប្អូនប្រជាពលរដ្ឋបាននាំគ្នារាយការណ៍ប្រាប់ទៅសមត្ថកិច្ចមូលដ្ឋានឲ្យចុះមកកន្លែងកើតហេតុ ដើម្បីធ្វើការពិនិត្យសាកសព ដោយសមត្ថកិច្ចជំនាញបានពិនិត្យឃើញថា ជនរងគ្រោះខាងលើបានស្លាប់ដោយសារតែខ្យល់គរពិតប្រាកដមែន ហើយក្រុមគ្រួសារជនរងគ្រោះមិនបានធ្វើការប្តឹងផ្តល់អីទាំងអស់។
ក្រោយមក សមត្ថកិច្ចមូលដ្ឋានបានធ្វើកំណត់ហេតុ និងបានប្រគល់សាកសពជនរងគ្រោះខាងលើឲ្យទៅក្រុមគ្រួសារ ដើម្បីដឹកយកទៅធ្វើបុណ្យតាមប្រពៃណីនៅឯគេហដ្ឋាន៕អត្ថបទ ទេព វណ្ណះ
