នៅរសៀលថ្ងៃទី២៥ ខែតុលានេះ លោក ជា ពេជ្រ ប្រធានព្រះរាជអាជ្ញា សាលាដំបូងខេត្តរតនគិរី បានដឹកនាំព្រះរាជអាជ្ញារង លោកឧត្ដមសេនីត្រី ផែន ឌីណា ស្នងការរង ទទួល ផែន’ព្រហ្មទណ្ឌ ព្រមទាំងនាយការិយាល័យព្រហ្ម ទណ្ឌកំរិតធ្ងន់ចុះទៅពិនិត្យកន្លែងកើតហេតុ និងនាំយកថវិការផ្ទាល់ខ្លួនចំនួន១លាន ៤សែន ២ម៉ឺនរៀល ទៅចូលបុណ្យក្រុមគ្រួសារសពដល់គេហដ្ឋាន នៅភូមិចងរ៉ា ឃុំបាតាង ស្រុកលំផាត់។
បន្ទាប់ពីមានការចូលបុណ្យដល់គ្រួសារសពមក ឪពុក ម្ដាយ សពយុវតីរងគ្រោះក៏បានជូនពរ ព្រមទាំងអង្វរយ៉ាងទទូច សុំឲ្យលោកព្រះរាជអាជ្ញារមេត្តាជួយរកយុត្ដិធម៌ឲ្យកូនស្រីគាត់ និង រកជនដៃដល់យកមកផ្ដន់ទាទោសឲ្យខានតែបាន ដើម្បីឲ្យវិញ្ញាណខ័ណ្ឌកូនស្រីពួកគាត់បានទៅកានសុគតិភពដោយស្ងប់ចិត្តផង។
ទន្ទឹមនិងនោះ ឪពុកម្ដាយសព ក៏បានស្នើសុំដល់លោកព្រះរាជអាជ្ញា ដើម្បីយកសម្ភារៈផ្ទាល់ខ្លួនទាំងអស់ របស់កូនស្រីគាត់ មកបញ្ចុះជាមួយសពតាមទំនាមទំលាប់ប្រពៃណីជនជាតិដើមភាគតិច លើកលែងតែម៉ូតូ និងទូរស័ព្ទ។
លោកព្រះរាជអាជ្ញា ក៏បានប្ដេជ្ញាចិត្តទាំងទឹកមុខក្រៀមក្រំ ក្នុងន័យអាណិតអាសូរ ដល់សពក្មេងស្រីថា ក្រុមសមត្ថកិច្ច សមត្ថកិច្ចជំនាញ និងតុលាការ ប្ដេជ្ញាចិត្តវែកមុខរកឃាតករ យក មកផ្ដន្ទាទោសឲ្យទាល់តែបាន។
ហើយលោកព្រះរាជ្ញាក៏បានវិភាក្សាភ្លាមៗ ជាមួយលោកស្នងការរង ដើម្បីសម្រួលសម្ភារៈផ្ទាល់ខ្លួន ដូចជា ខោជនរង្គ្រោះ កាបូបស្ពាយ ព្រមទាំងសៀវភៅ និងឯកសារផ្សេងៗទៀត ប្រគល់ឲ្យឪពកម្ដាយសព នៅរសៀលថ្ងៃទី២៦ ស្អែកនេះ៕អត្ថបទ ទេព វណ្ណះ
