ហេតុការណ៍គ្រោះថ្នាក់ចរាចរណ៍ដ៏រន្ធត់នេះបានកើតឡើងកាលពីវេលាម៉ោង ៥និង២០នាទីល្ងាច ថ្ងៃទី០៤ ខែតុលា ឆ្នាំ២០១៧ ដែលនៅតាមបណ្តោយផ្លូវជាតិលេខ៥ ខាងត្បូងស្ពាន លី យ៉ុងផាត់ ចម្ងាយប្រហែលជា ១០០ម៉ែត្រ ស្ថិតក្នុងភូមិឡកំបោរ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។
សពបុរសរងគ្រោះមានឈ្មោះ សែម សៀម ហៅម៉ៃ អាយុ ២៥ឆ្នាំ មុខរបរ ចិញ្ចឹមត្រី មានទីលំនៅភូមិឌួង សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។
បើតាមប្រភពព័ត៌មានពីកន្លែងកើតហេតុ បានប្រាប់អោយដឹងថា នៅមុនពេលកើតហេតុ គេបានរកឃើញរថយន្តដឹកឥដ្ឋ មួយគ្រឿង ពណ៌ស ដោយមិនបានចាំម៉ាក និងស្លាកលេខនោះ បានធ្វើដំណើរក្នុងទិសដៅពីត្បូងទៅជើង ខណៈពេលធ្វើដំណើរមកដល់ចំណុចកើតហេតុខាងលើ ស្រាប់តែមានម៉ូតូ មួយគ្រឿង ម៉ាក សង់កូរ៉េ ពណ៌ក្រហម ពាក់ស្លាកលេខ ភ្នំពេញ 1BX-0674 បានធ្វើដំណើរក្នុងទិសដៅជើងទៅត្បូងដោយបញ្ជ្រាស់ទិសគ្នា ភ្លាមៗស្រាប់តែម៉ូតូរងគ្រោះបានគេចក្រលុក ហើយក៏រអិលបណ្តាលអោយរថយន្តដឹកឥដ្ឋបុកនិងកិនពីលើស្លាប់ភ្លាមៗតែម្តង។
ក្រោយពេលកើតហេតុ រថយន្តបង្កបានបើករត់គេចខ្លួនបាត់ ដោយបន្សុល់ទុកតែសពជនរងគ្រោះ និងម៉ូតូនៅនឹងកន្លែងកើតហេតុតែប៉ុណ្ណោះ។
ក្រោយកើតហេតុ សមត្ថកិច្ចជំនាញចរាចរណ៍ខណ្ឌ បានធ្វើកំណត់ហេតុ និងប្រគល់សាកសពជនរងគ្រោះខាងលើអោយទៅក្រុមគ្រួសារដឹកយកទៅធ្វើបុណ្យនៅឯស្រុកកំណើតនៅខេត្តកំពង់ចាម៕អត្ថបទ ទេព វណ្ណះ
