Lee ស្រី​ស្អាត​ជើង​ឯកវាយ​ក្នុង​ទ្រុង ONE Championship រក​ឃើញ​គូ​អនាគត

ម្ចាស់​ជើង​ឯក ONE Championship អាស៊ី-កាណាដា កីឡា​ការិនី​ Angela Lee ពេល​នេះ​បាន​ភ្ជាប់​ពាក្យ​ជាមួយ​មិត្ត​ប្រុស​សញ្ជាតិ​ប្រេស៊ីល​  Bruno Pucci ដែល​ជា​កីឡាករ​វាយ​ក្នុង​ទ្រុង​ដូច​គ្នា។

Lee បាន​ប្រកាស​​ដំណឹង​នេះ​លើ​​បណ្ដាញ​សង្គម Instagram កាល​ពី​ចុង​សប្ដាហ៍​កន្លង​ទៅ នៅ​ពេល​ដែល​គូ​ស្នេហ៍​ទាំង​ពីរ​ទៅ​លេង​នៅ​កោះ ហាវ៉ៃ។ "YES! YES! YES! Bruno Pucci អរគុណ​ដែល​បាន​បំពេញ​​រឿង​ដ៏​អស្ចារ្យ​របស់​ខ្ញុំ។ ខ្ញុំ​មិន​អាច​រក​ចាំ​ថ្ងៃ​ផ្លូវការ​ ក្លាយ​ជា​ភរិយា​របស់​អ្នក​បាន​ឡើយ"។ នេះ​ជា​អ្វី​ដែល Lee បាន​សរសេរ​ភ្ជាប់​ជាមួយ​រូប​ចិញ្ចៀន។ ​

Lee វ័យ​២១ និង Bruno Pucci​ វ័យ​២៧​ឆ្នាំ​ បាន​ចាប់​ផ្ដើម​ស្រឡាញ់​គ្នា​តាំង​ពី​ខែ មករា ដើម​ឆ្នាំ​នេះ។ Bruno Pucci ជា​គ្រូ​ក្បាច់គុន​ប្រេស៊ីល ​jiu-jitsu  ក្នុង​ក្លឹប Evolve MMA ហើយ​ក៏​ជា​កីឡាករ​ក្នុង​ស្ថាប័ន ONE Championship ដូច​គូដណ្ដឹង​ដែរ។ ចំណែក ​ Angela Lee ​ដែល​ជាប់​សាច់​ឈាម​សិង្ហបុរី-កូរ៉េ​ និង​វាយ​តំណាង​ឲ្យសិង្ហបុរី គឺ​ជា​ម្ចាស់​ខ្សែ​ក្រវាត់ ONE Championship ទម្ងន់ Atomweight ដោយ​បាន​វាយ​ឈ្នះ​កីឡា​ការិនី​ជប៉ុន Mei Yamaguchi  កាល​ពី​ឆ្នាំ​២០១៦៕ ​​

ប្រភព៖ Channelnewsasia