ខេត្តបាត់ដំបង ៖ នាព្រឹកថ្ងៃទី១៦ ខែតុលា ឆ្នាំ២០១៧ លោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ លោកឧត្តមសេនីយ៍ទោ អ៊ុង សុវណ្ណ នាយករង នាយកដ្ឋានផ្គត់ផ្គងស្បៀងក្រសួងការពារជាតិ ប្រចាំតំបន់១បន្ទាយមានជ័យ របស់យោធភូមិភាគទី៥ បានដឹកនាំប្រតិភូកងទ័ព ក្នុងយោធភូមិភាគទី៥ និងអាជ្ញាធរឃុំ ស្រុកខេត្ត សរុបប្រមាណ៥០នាក់ ចុះធ្វើទស្សនកិច្ចសិក្សា សម្ពោធអាគារទីបញ្ជាការកងអនុសេនាធំស៊ើបការណ៍ និងធ្វើទស្សនសិក្សាដល់កងវរសេនាតូចការពារអាកាសរបស់កងពលតូចថ្មើរជើងលេខ៥១ ចំណុះឲ្យយោធភូមិភាគទី៥ ស្ថិតនៅក្នុងភូមិភ្នំជញ្ជាំង ឃុំជប់វ៉ារី ស្រុកព្រះនេត្រព្រះ ខេត្តបន្ទាយមានជ័យ។
ចំណាប់អារម្មណ៍បស់លោកមេបញ្ជាការវរសេនាតូចលេខ៥១៣ លេខ៥០៥ នៅតាមខ្សែបន្ទាត់ព្រំដែន និងប្រធានមន្ទីរកសិកម្មខេត្តបន្ទាយមានជ័យបានផ្តោតទៅលើការរីកចម្រើនរបស់អង្គភាពនេះ ដោយសារមានការជួយជ្រោមជ្រែងជំរុញលើវិស័យកសិកម្ម ការចិញ្ចឹមសត្វ និងការដឹកនាំល្អ ទើបពេលនេះលទ្ធផលទទួលបានមកផ្លែផ្កាល្អ ដែលជាការលើកស្ទួយដល់ជីវភាពកងទ័ពកាន់តែមានភាពល្អប្រសើរឡើងច្រើន។ លោកឧត្តមសេនីយ៍ត្រី សេង ធារិន មេបញ្ជាការកងពលថ្មើរជើងលេខ៥១ បានមានមតិស្វាគមន៍ដល់សមាសភាពដែលមកចូលរួមពីតាមបណ្តាអង្គភាពផ្សេងៗនៅតាមខ្សែបន្ទាត់ព្រំដែនដែលមានចំនួន១៦២នាក់ និងរាយកាណ៍ពីស្ថានភាពការងារកសាងពង្រឹងកងឯកភាពរឹងមាំលើគ្រប់វិស័យរបស់អង្គភាពនានាចំណុះឲ្យកងពលថ្មើរជើងលេខ៥១ ស្ថិតនៅក្នុងទីបញ្ជាការដោយធានាបានការហូបចុក ការស្នាក់នៅ ការចិញ្ចឹមទ័ព និងបន្តការហ្វឹកហ្វឺន សំខាន់អនុវត្តលើការងារបច្ចេកទេសព័ត៌មានវិទ្យាមានរបាយការណ៍ និងរូបភាពរាយការណ៍ទៅថ្នាក់លើ ដែលអង្គភាពកងពលត្រូវធ្វើម្ចាស់ការដោយខ្លួនឯងជាបន្តបន្ទាប់។
លោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ បានបញ្ជាក់ថា ក្នុងការចាត់តាំងអនុវត្តធ្វើទស្សនកិច្ចសិក្សា លើការងារកសាងពង្រឹងកងឯកភាពរឹងមាំលើគ្រប់វិស័យ ចាប់ពីដើមឆ្នាំ២០១៥ មកម្ល៉េះ។ ក្នុងនាមមេបញ្ជាការយោធភូមិភាគទី៥ សូមកោតសរសើរចំពោះមេបញ្ជាការ មេបញ្ជាការរង នាយ ពលទាហាន កងអនុសេនាធំស៊ើបការណ៍ និងកងការពារអាកាសទាំងអស់ ដែលបានយកចិត្តទុកដាក់អនុវត្តភារកិច្ចដែលថ្នាក់លើប្រគល់ឲ្យប្រកបដោយស្មារតីទទួលខុសត្រូវ ដែលបានបញ្ជាក់នូវ ឆន្ទៈ គាំទ្រ ចូលរួមអនុវត្តផែនការកសាងកងឯកភាពរឹងមាំលើគ្រប់វិស័យដែលយោធភូមិភាគទី៥បានដាក់ចុះ របស់មេបញ្ជាការ មេបញ្ជាការរង តាមលំដាប់ថ្នាក់ នាយ ពលទាហាន ទាំងអស់ស្តែងចេញជាលទ្ធផលក្នុងការងារដឹកនាំ កសាងកងឯកភាព កែប្រែជីវភាពរស់នៅ សុខមាលភាពរបស់កងទ័ព មានការប្រែប្រួលឈានឡើងជាបន្តបន្ទាប់ តាមរយៈការចាត់តាំងអនុវត្តធ្វើទស្សនកិច្ចសិក្សា ពីកងឯកភាពមួយទៅកងឯកភាពមួយ។
លោកឧត្តមសេនីយ៍ឯក បានបន្ថែមទៀតថា ការជំរុញឲ្យមានទស្សនសិក្សានេះគឺជាការជំរុញតាមគ្រប់បណ្តាអង្គភាពឲ្យមានការរីកចម្រើនដោយបានស្វែងយល់បទពិសោធន៍ពីគ្នាទៅវិញទៅមក ហើយមកអនុវត្តន៍តាមអង្គភាពខ្លួនវិញឲ្យមានសកម្មភាពដូចអង្គភាពផ្សេងៗទៀត ដែលមានការវិវត្តទៅមុខជាលំដាប់នេះ។ ហើយលោកឧត្តមសេនីយ៍ឯកបានផ្តោតការកសាងអង្គភាពមាន៤ចំណុចដែលកងកម្លាំងទាំងអស់ត្រូវអនុវត្តបានគឺ ១/របាយការណ៍ជាប្រចាំដែលត្រូវមានពីសកម្មភាពក្នុងអង្គភាព និងភោគផលកសិកម្ម ចិញ្ចឹមសត្វ ដែលសល់ពីការផ្គត់ផ្គង់ក្នុងអង្គភាពរហូតដល់មានលក់នៅលើទីផ្សារ។ ២/រូបភាពគ្រប់សកម្មភាពទាំងអស់ដែលក្នុងអង្គភាពកំពុងធ្វើជារៀងរាល់ថ្ងៃដោយតម្រូវតាមសម័យកាលនេះប្រព័ន្ធផ្សព្វផ្សាយតាមបច្ចេកវិទ្យាទំនើបកំពុងអនុវត្តន៍ជារួមក្នុងអង្គភាពរហូតដល់ផ្ទៃប្រទេសទាំងមូល និងអន្តរជាតិកំពុងទទួលស្គាល់ដោយម្ចាស់ការលើខ្លួនឯង។
៣/ស្វែងយល់ទស្សនសិក្សាដែលមានពីអង្គភាពមួយទៅអង្គភាពមួយទៀត យកបទពិសោធន៍ល្អៗមកអនុវត្តន៍នៅក្នុងអង្គភាពរបស់ខ្លួនវិញឲ្យមានសកម្មភាពដូចៗគ្នា។ ៤/ត្រូវមានការប្រជុំបូកសរុបវាយតម្លៃចំណុចខ្លាំងខ្សោយពីសកម្មភាពការងារក្នុងអង្គភាពជាប្រចាំថ្ងៃ ប្រចាំសប្តាហ៍ ត្រីមាស ឆមាស រហូតប្រចាំឆ្នាំ ដើម្បីរិះរកចំណុចល្អៗមកអនុវត្តបន្តនៅក្នុងអង្គភាពរបស់ខ្លួនបន្ថែមទៀត។ ក្នុងនោះលោកឧត្តមសេនីយ៍ឯក ប៊ុន សេង បានផ្តល់ថវិកាជួយក្នុងកម្មវិធីទស្សនសិក្សាទាំងមូលក្នុងអង្គភាពកងពលចំនួន១លានរៀល ៕
