ខេត្តមណ្ឌលគិរី ៖ ទីតាំងស្តុបឈើដុះស្លែមួយកន្លែងត្រូវបានជំនាញរដ្ឋបាលព្រៃឈើកែវសីមា ចុះចាប់បង្ក្រាបបានឈើជាច្រើនកំណាត់ កាលពីរសៀលថ្ងៃទី១៦ តុលា ២០១៧ នៅភូមិអូរអាម ឃុំស្រែខ្ទុម ស្រុកកែវសីមា។
លោក ជុយ សុខឃាង នាយផ្នែករដ្ឋបាលព្រៃឈើកែវសីមា បានឲ្យដឹងថា ជំនាញបានសហការជាមួយកម្លាំងស្នាក់ការ៧៦១ រដ្ឋបាលព្រៃឈើមេគង្គ នឹងនគរបាលមូលដ្ឋាន បានចុះឆែកលំនៅដ្ឋានមួយកន្លែងដែលមានស្តុបឈើខុសច្បាប់។ ក្រោយធ្វើការឆែកឆេរកម្លាំងចម្រុះបានរកឃើញខុសច្បាប់ចំនួន២៣ដុំ ប្រភេទឈើគគីរចំនួន១៣ដុំ ឈើសុក្រំចំនួន៨ដុំ និងឈើកកោះចំនួន២ដុំ។
ជំនាញបានបញ្ជាក់ថា ទីតាំងផ្ទះស្តុបឈើខាងលើមានឈ្មោះ យាន ស្រល់ អាយុ៣២ឆ្នាំ មុខរបរមិនពិតប្រាកដ បច្ចុប្បន្នរត់គេចខ្លួនបាត់ស្រមោល ចំណែកឈើល្មើសច្បាប់ដែលកម្លាំងជំនាញបង្ក្រាបខាងលើ បានយកទៅរក្សាទុកនៅស្នាក់ការរដ្ឋបាលព្រៃឈើ ដើម្បីចាត់ការបន្ត។
ក្រុមអ្នកតាមដានបទល្មើសព្រៃឈើបាននិយាយថា សព្វថ្ងៃគេសង្កេតឃើញមានសកម្មភាពដឹកជញ្ជូនឈើខុសច្បាប់ក្នុងដែនជម្រកសត្វព្រៃកែវសីមា គ្មានលោះមួយថ្ងៃ ខណៈរបាយការណ៍ជាច្រើនបានបង្ហាញពីការបាត់បង់ព្រៃឈើជាបន្តបន្ទាប់ ៕
