១.អ្នកប្រាកដជាត្រូវការជំនួយ
ចូរកុំសន្មតថា ការបំបៅទារកមានភាពងាយស្រួលឲ្យសោះ ព្រោះឃើញមនុស្សជាច្រើនអាចធ្វើបានដោយគ្មានបញ្ហា។ តែធាតុពិតវាមិនដូចការគិតបែបនោះឡើយ ការបំបៅដោះកូនដែលទើបដឹងកើតពិតជាពិបាក ដោយសារតែអ្នកខ្លះគ្មានបទពិសោធ បូករួមទាំងទារកនៅខ្ចីថ្ងៃទៀតមិនអាចជួយអ្វីបានច្រើន ដូចនេះហើយទើបពួកគេត្រូវមានចាស់ទុំនៅក្បែរដើម្បីបង្ហាត់បង្រៀន។
២.ពេលបំបៅដោះកូនមានអាការៈឈឺចាប់
រូបភាពរបស់ម្ដាយដែលឲ្យកូនបៅ មើលទៅដូចជាស្ងប់ស្ងាត់គ្មានអ្វីសោះ។ ប៉ុន្តែទារកទើបនឹងកើតមានសភាពឃ្លាន (ឃ្លាន និងខឹង) ហើយវាតែងតែត្រូវខំប្រឹងជញ្ជក់ឲ្យចេញទឹកដោះ ដែលនោះហើយជាហេតុបណ្ដាលឲ្យឈឺចាប់ ឬស្រគាលដោះ ហើយនៅពេលពួកគេចាប់ផ្ដើមមានធ្មេញ ម្ដាយជាច្រើនតែងប្រឈមបញ្ហាមុត ឬរយៈត្រង់ក្បាលដោះជានិច្ច។
រូបតំណាង
៣.ព្យាយាមរក្សាភាពស្ងប់ស្ងៀមទោះជាត្រូវទទួលរងភាពឈឺចាប់បន្តិចបន្តួច ឬច្រើន ក៏ត្រូវតែព្យាយាមខាំមាត់សង្កត់ចិត្ត និងមិនបង្ហាញអាកប្បកិរិយាណាមួយធ្វើឲ្យប៉ះពាល់ដល់កូនតូចដែរ។
៤.កុំបន្ថែមអាហារផ្សេងដល់ទារកទើបកើត
ចូរបំបៅដោះកូនដោយទឹកដោះតែមួយមុខគត់ដល់ពួកគេមានអាយុ ៦ ខែ។ អំឡុងពេលនេះទឹកដោះម្ដាយអាចផ្ដល់សារជាតិចិញ្ចឹមគ្រប់គ្រាន់ដល់កូនតូចបាន ហើយចាំពេលពួកគេ ៦ ខែឡើងអ្នកអាចបន្ថែមអាហារបំប៉នផ្សេងៗទៀតបាន៕
ប្រភព៖ Shape ប្រែសម្រួល៖ ឡៃហ៊ាង
