សពជនរងគ្រោះមានឈ្មោះ វុទ្ធី ចាន់ដេត ភេទប្រុស អាយុ ២២ឆ្នាំ មុខរបរធ្វើការនៅហាងលក់បាយ ក្បែរសាលាអន្តរជាតិហ្សាមែន ស្នាក់នៅផ្ទះលេខ១៤.១៥ ភូមិទួលរកា សង្កាត់ចាក់អង្រែក្រោម ខណ្ឌមានជ័យ ។តាមប្រភពព័ត៌មាន ពីកន្លែងកើតហេតុ បានឱ្យដឹងថា មុនពេលកើតហេតុ គេបានឃើញ បុរសរងគ្រោះ មិនដឹងថាគោលបំណងទៅណានោះទេ គឺបានជិះម៉ូតូម៉ាក អាខុន ពណ៌ក្រហម លាយស ពាក់ស្លាកលេខ ភ្នំពេញ 1AH-8920 បានធ្វើដំណើរតាមផ្លូវជាតិលេខ២ ក្នុងទិសដៅពីជើងទៅត្បូង ក្នុងល្បឿនលឿន ។
ខណៈមកដល់ចំនុចកើតហេតុ មិនដឹងជាយ៉ាងម៉េចនោះទេ ស្រាប់តែឃើញម៉ូតូបានរេចង្កូតឡើងលើចិញ្ចើមផ្លូវ ជ្រុលទៅបុករះដើមដូងដែលគេដាក់តាំង បណ្ដាលឱ្យបែកអស់ចំនួន ២ផើង រួចហើយម៉ូតូមិនទាន់អស់ល្បឿន បានជ្រុលទៅបុកផ្ទប់នឹងបង្គោលភ្លើងដែក ធ្វើឱ្យអ្នកបើកម៉ូតូហោះផ្ទប់បោកក្បាលទៅនឹងបង្គោលភ្លើងបែកមុខបែកមាត់ ធ្លាយខួរចេញមកក្រៅ ស្លាប់គួរឱ្យរន្ធត់ ចំនែកម៉ូតូរងការខូចខាតស្ទើរទាំងស្រុង ។ក្រោយពេលកើតហេតុ មានក្រុមគ្រួសារ សាច់ញាតិ ទាំងប្រុសទាំងស្រី បានមកយំសោកឱប សពជនរងគ្រោះ ទាំងទឹកភ្នែកហូរ និងអារម្មណ៍សោកសៅបំផុត ។
បើតាមការបញ្ជាក់ពីក្រុមគ្រួសារ របស់ជនរងគ្រោះបានឱ្យដឹងថា ជនរងគ្រោះ ទើបតែចេញមកពីធ្វើការ នៅម្តុំស្ថានទូតសូរវៀត ហើយគោលបំណងត្រឡប់មកផ្ទះវិញ នៅសង្កាត់ចាក់អង្រែក្រោម ខណ្ឌមានជ័យ តែមិនដឹងជាជនរងគ្រោះ បើកម៉ូតូយ៉ាងម៉េចនោះទេ ទើបជួបគ្រោះថ្នាក់បែបនេះ ។ក្រោយពេលកើតហេតុ គេបានឃើញសមត្ថកិច្ចមូលដ្ឋាន និងជំនាញខណ្ឌមានជ័យ បានចុះទៅកន្លែងកើតហេតុ រួចហើយបានធ្វើលិខិតប្រគល់សពជនរងគ្រោះ ឱ្យក្រុមគ្រួសារសាច់ញាតិ យកទៅតម្កល់ទុក និងធ្វើបុណ្យនៅវត្តចាក់អង្រែក្រោម ចំនែកម៉ូតូត្រូវបានសមត្ថកិច្ចប្រគល់ឱ្យបងប្អូនយកទៅរក្សាទុក ៕អត្ថបទ ទេព វណ្ណះ
