ហេតុការណ៍នេះ បានកើតឡើងកាលពីវេលាម៉ោង៦ល្ងាច ថ្ងៃទី១២ ខែតុលា ឆ្នាំ២០១៧ ស្ថិតនៅខាងមុខតូបលក់ចាប់ហួយ ដែលមានម្ចាស់ឈ្មោះ គន្ធា ស្ថិតនៅភូមិត្រពាំងអារក្ស សង្កាត់ឪឡោក ខណ្ឌពោធិ៍សែនជ័យ។
ជនរងគ្រោះមានឈ្មោះ ផុល ម៉ាប់ ភេទប្រុស អាយុ៣៧ឆ្នាំ មុខរបរជាកសិករ រស់នៅភូមិត្រពាំងអារក្ស សង្កាត់ឪឡោក ខណ្ឌពោធិ៍សែនជ័យ។ ម៉ូតូដែលជនសង្ស័យលួចមិនបានសម្រេចនោះ ម៉ាកឌ្រីមសង់ ពណ៌ខ្មៅ ស៊េរី២០១៣ ពាក់ស្លាកលេខ សៀមរាប 1M-9963។
តាមប្រភពព័ត៌មានពីជនរងគ្រោះបាននិយាយថា នៅមុនពេលកើតរូបគាត់ បានជិះម៉ូតូទៅរកទិញបារី នៅតូបរបស់ឈ្មោះ គន្ធា ដែលនៅភូមិកើតហេតុខាងលើ លុះជិះម៉ូតូដល់មុខតូបគាត់បានចុះពីលើម៉ូតូដោយមិនបានដកសោចេញឡើយ រួចដើរទៅទិញបារី តែមិនទាន់ទិញបានផងស្រាប់តែឃើញជនសង្ស័យមានគ្នា ៣ នាក់ ជិះម៉ូតូមួយគ្រឿងមិនចាំម៉ាក បន្ទាប់មកជនសង្ស័យម្នាក់បានចុះពីលើម៉ូតូ ហើយបញ្ឆេះបើករត់តែម្តង ឃើញបែបនេះគាត់បានប្តឹងសមត្ថកិច្ចឲ្យជួយអន្តរាគមន៍ភ្លាមៗផងដែរ។
ក្រោយពេលកើតហេតុ សមត្ថកិច្ចបាននាំជនរងគ្រោះ និង ម៉ូតូយកទៅសួរនាំនៅប៉ុស្តិ៍នគរបាលរដ្ឋបាលឪឡោក ហើយធ្វើលិខិតប្រគល់ម៉ូតូឱ្យជនរងគ្រោះវិញ ៕
