ប្រជាពលរដ្ឋបាននិយាយថា អស់ពេលប្រមាណជាង២ខែមកហើយ គេបានឃើញចំណុចអូរខាងលើ ដែលមានទឹកច្រប់ទាំងប្រាំង និងវស្សា ត្រូវបានអ្នកមានឥទ្ធិពលម្នាក់ បញ្ជាគ្រឿងចក្រឲ្យកាយ និងដឹកដីចាក់លុបត្រពាំងទឹក និងអូរធម្មជាតិ ទាំងសងខាងផ្លូវ ដែលយ៉ាងហោចអាចមានទំហំដល់ទៅពីរហិចតា ។
អូរធម្មជាតិ និងត្រពាំងទឹកច្រប់នោះ ត្រូវបានប្រជាពលរដ្ឋអះអាងថា មានទឹកហូរមិនដាច់ទោះរដូវប្រាំង ក៏ពួកគាត់អាចអាស្រ័យផលពីទឹកអូរនោះបានដែរ ដោយពួកគាត់អាចដងទឹកនោះសម្រាប់ស្រោចស្រពដំណាំ និងនេសាទត្រីម្តងម្កាលផងដែរ ។ មិនត្រឹមតែប៉ុណ្ណោះដីទីតាំងខាងលើ គឺស្ថិតនៅកណ្តាលក្រុងសែនមនោរម្យតែម្តង បើសិនជាគេចាក់ដីពេញរួចធ្វើការអភិវឌ្ឍន៍នោះ ប្រាកដជាបានចំណេញប្រាក់ច្រើនណាស់ ចឹងហើយបានជាមានសកម្មភាពដឹកដីចាក់បំពេញចំណុចទីតាំងខាងលើ ដើម្បីផលប្រយោជន៍ណាមួយ ។
ទោះជាយ៉ាងណាក៏ដោយ ការអះអាងខាងលើ ត្រូវបានប្រជាពលរដ្ឋនៅតែមានមន្ទិលសង្ស័យខ្លះៗចំពោះការចាក់ដីលុបទីតាំងខាងលើ ខណៈអាជ្ញាធរខេត្តក៏មិនទាន់មានការបំភ្លឺជុំវិញបញ្ហានេះនៅឡើយ ៕
