ត្រលប់ទៅអតីតកាល ការចាកចេញរបស់ David Beckham ពី Manchester United បានធ្វើឲ្យអ្នកគាំទ្រជាច្រើនគ្រាំចិត្ត ប៉ុន្តែ Gary Neville បែរជាធូរចិត្តទៅវិញ ពេលឃើញមិត្តរួមក្រុមផ្លាស់ក្លឹប។
ម្ចាស់អាវលេខ៧នៅបិសាចក្រហម បានប្ដូរទ្រនំទៅ Real Madrid នៅឆ្នាំ២០០៣ បន្ទាប់ពីមានជម្លោះជាមួយអ្នកចាត់ការលោក Sir Alex Ferguson នៅក្នុងបន្ទប់ផ្លាស់សំលៀកបំពាក់។ គ្រានោះ Ferguson បានទាត់ស្បែកជើងម្ខាងចំមុខ Beckham ធ្វើឲ្យទំនាក់ទំនងរវាងអ្នកទាំងពីរកាន់តែប្រេះឆាខ្លាំងឡើង។ នេះយោងតាមសារព័ត៌មានអង់គ្លេស Manchester Evening News។
Gary Neville ដែលបានចំណាយជីវិតបាល់ទាត់នៅ Old Trafford ពេញមួយអាជីព និងជាមិត្តសំឡាញ់របស់ Beckham បានបញ្ចេញអារម្មណ៍របស់ខ្លួនជាមួយទូរទស្សន៍អនឡាញ StrettyNewsTV នាពេលកន្លងទៅថា ធូរចិត្តពេលឃើញមិត្តរួមដើរចេញ។
“ខ្ញុំខកចិត្ត ពេលដែល Beckhamចេញ ហើយក៏មិនសប្បាយចិត្តពេល Nicky Buttចេញ។ ពួកគេជាចំណែកដ៏ធំនៃជីវិតរបស់ពួកយើងនិង United។ តែដោយសេចក្ដីស្មោះត្រង់ ពេលនោះខ្ញុំសោកស្ដាយ ប៉ុន្តែប្រហែលជាពាក្យនេះមិនពិតទេ។ ពេលនោះខ្ញុំមានអារម្មណ៍ថាធូរបន្តិច។ សម្រាប់ David និងក្លឹប មិនគួរចប់គ្នាដោយក្ដីអាក្រក់បែបនេះទេ"។ សម្ដី Neville។ ក្រោយចូលរួមជាមួយស្ដេចស David Beckham បានបន្តនាវាជីវិតជាមួយ Los Angeles Galaxy រួមខ្ចីជើងទៅ AC Milan ២រដូវកាលនិងចុងក្រោយបញ្ចប់អាជីពនៅ Paris Saint-Germain ឆ្នាំ២០១៣៕
ប្រភព៖
Mirror
