វិបសាយ The Nation របស់ប្រទេសថៃបានរកឃើញថាក្រុមហ៊ុន Apple កំពុងរើសបុគ្គលិកជាច្រើនមុខតំណែងដើម្បីបម្រើការងារនៅហាងលក់ផលិតផល Apple ផ្លូវការ ដែលមានទីតាំងនៅទីក្រុងបាងកក។
អ្នកនាំពាក្យក្រុមហ៊ុន Apple មួយរូបបានលើកឡើងថាទាំងដំណឹងពីទីតាំងជាក់លាក់ និងកាលបរិច្ឆេទនៃការបើកហាងលក់នេះត្រូវបានរក្សាទុកយ៉ាងសម្ងាត់បំផុត។ ក្នុងសេចក្ដីថ្លែងការណ៍មួយរបស់ក្រុមហ៊ុន Apple បានលើកឡើងដែរថា ៖ "យើងពិតជារំភើបណាស់ ចំពោះការចាប់ផ្ដើមរើសក្រុមបុគ្គលិក ដែលនឹងចូលបម្រើការងារក្នុង Apple Store ប្រទេសថៃ”។
បច្ចុប្បន្ននេះប្រជាជនថៃត្រូវទិញផលិតផល Apple តាមរយៈវិបសាយអនឡាញ ឬ តាមដៃគូលក់របស់ Apple។ ហាង Apple Store ផ្លូវការដែលនៅក្បែរប្រទេសថៃបំផុត មានទីតាំងនៅសិង្ហបុរី និងប្រទេសចិន។
ICON Siam ដែលគ្រោងបើកដំណើរការឆ្នាំ ២០១៨
កាលពីដើមឆ្នាំចចាមអារ៉ាមក៏បានឲ្យដឹងដែរថាសាខាលក់របស់ Apple ថ្មីនេះនឹងបើកដំណើរការនៅឆ្នាំ ២០១៨ នៅផ្សារទំនើប ICON Siam ទីក្រុងបាងកក ដោយមានទំហំដល់ ១៩៥០ ម៉ែត្រការ៉េ។ Apple ក៏ពិចារណាលើការបោះទីតាំងនៅ CentralWorld, Central Embassy ឬ Siam Paragon ផងដែរ៕
ប្រភព៖
AppleInsider
