តាមប្រភពព័ត៌មានពីនគរបាលបានឱ្យដឹងថា យុវជនជាជនសង្ស័យដែលបានឃាត់ខ្លួនទី១-ឈ្មោះ សៀង មង្គលសិរី អាយុ១៥ឆ្នាំ មុខរបរសិស្សមានទីលំនៅភូមិអូរអណ្តូង ក្នុងសង្កាត់គោករកា ខណ្ឌព្រែកព្នៅ និងទី២-ឈ្មោះ វណ្ណ ចាន់សុវត្ថិ ភេទប្រុស អាយុ ១៦ឆ្នាំ មុខរបរសិស្ស ទីលំនៅក្នុងភូមិអូអណ្តូង សង្កាត់គោករកា ខណ្ឌព្រែកព្នៅ ។
តាមប្រភពដដែលបន្តទៀតថា មុនពេលកើតហេតុមានជនបរទេសវ័យចំណាស់ពីរនាក់ប្តីប្រពន្ធបាននាំគ្នាដើរ ចេញពីកោះពេជ្រ ក៏ស្រាប់តែមានក្រុមជនសង្ស័យទាំងពីរនាក់ជិះម៉ូតូមួយគ្រឿង ព៌ណទឹកមាសស៊េរីឆ្នាំ២០១៧ ស្លាកលេខ ភ្នំពេញ ១GQ-៤៣៤០ មួយគ្រឿងឌុបគ្នា និងធ្វើសកម្មភាពឆក់យកការបូបស្ពាយពីពួកគាត់តែម្តងតែភ្លាត់ស្នៀតក៏ដួល ហើយក៏ត្រូវបានកម្លាំងមានសម្ថកិច្ចដែលល្បាតនៅក្បែរនោះចាប់បានទាំងពីរនាក់តែម្តង។ក្រោយពេលកើតហេតុ ជនបរទេសវ័យចំណាស់រងគ្រោះទាំងពីរនាក់ប្តីប្រពន្ធមិនបានមកដាក់ពាក្យបណ្តឹងឡើយនិងបន្តដំណើរចេញទៅបាត់ពីកន្លែងកើតហេតុ ចំណែកឯក្រុមជនសង្ស័យជាចោរឆក់ទាំងពីរនាក់ ត្រូវបាននាំខ្លួនមកធ្វើការសាកសួរ និងកំណត់ហេតុនៅនគរបាលប៉ុស្តិ៍ទន្លេបាសាក់ ដើម្បីបញ្ជូនខ្លួនទៅកាន់អធិការដ្ឋាននគរបាលខណ្ឌចំការមនចាត់ការទៅតាមផ្លូវច្បាប់ជាបន្តទៅទៀត៕អត្ថបទ ទេព វណ្ណះ
