ខេត្តបាត់ដំបង ៖ សេចក្តីរាយការណ៍បឋមឱ្យដឹងថា មានការភ្ញាក់ផ្អើលមួយយ៉ាងខ្ងលាំ ក្រោយខ្មាន់កាំភ្លើងបានបាញ់រះទៅលើផ្ទះមួយកន្លែងជាច្រើនគ្រាប់ទាំងយប់ ហើយករណីនេះត្រូវសមត្ថកិច្ចសង្ស័យថា គឺជាការបាញ់គំរាមម្ចាស់ផ្ទះ ហេតុការណ៍នេះកើតឡើងកាលពីវេលាម៉ោង១១ និង៥៤យប់ថ្ងៃទី១៤ កញ្ញា ស្ថិតត្រង់ចំណុចភូមិព្រែកព្រះស្តេច សង្កាត់ព្រែកព្រះស្តេច ក្រុងបាត់ដំបង ខេត្តបាត់ដំបង ។
សេចក្តីរាយការណ៍បន្តថា ករណីបាញ់យ៉ាងសាហាវនេះ នៅមិនទាន់ស្គាល់អត្តសញ្ញាណជនបង្កនោះទេ ខណៈសមត្ថកិច្ចធ្វើការស្រាវជ្រាវហើយ ។ បើតាមការពិនិត្យ កាំភ្លើងរបស់ខ្មាន់កាំភ្លើង គឺម៉ាក Lock ដោយជនសង្ស័យបាញ់ទៅលើផ្ទះជនរងគ្រោះឈ្មោះអៀន រដ្ឋា ភេទប្រុស អាយុ៣៥ឆ្នាំ ជាអ្នកលក់ឡាន មានទីលំនៅចំណុចកើតហេតុខាងលើ ។
នៅកន្លែងកើតហេតុឃើញថា បានរងការខូចខាតសម្ភារមួយចំនួនរួមមាន រថយន្ត២គ្រឿង ម៉ាកព្រូស ពណ៌.ស្ករ ពាក់ស្លាកលេខភ្នំពេញ 2AK-1712 និងមួយគ្រឿងទៀតម៉ាក HighLander ពណ៌ទឹកប្រាក់ ពាក់ស្លាកលេខបាត់ដំបង 2B-0106, ម៉ូតូម៉ាកស្គូពី១គ្រឿង ពាក់ស្លាកលេខបាត់ដំបង1V-6967 ។
បច្ចុប្បន្ន សមត្ថកិច្ចកំពុងធ្វើការស្រាវជ្រាវបន្ត ដើម្បីស្វែងរកដៃដល់ ៕អត្ថបទ ទេព វណ្ណះ
