តាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញរថយន្តមួយគ្រឿង ពណ៌ខ្មៅ ពាក់ស្លាកលេខ ភ្នំពេញ ២P-២១៨៥ បើកបរដោយបុរសម្នាក់មិនស្គាល់អត្តសញ្ញាណ អាយុ៣០ឆ្នាំ ធ្វើដំណើរតាមបណ្តោយផ្លូវ៣១៧ទិសដៅពីកើតទៅលិច និងក្នុងល្បឿនយ៉ាងលឿនដូចហោះ ។ លុះមកដល់ចំណុចកើតហេតុដែលជាផ្លូវបំបែករថយន្តបង្កបំរុង និងបត់ឆ្វេងទៅផ្លូវ៥៩៨តែបួងចង្កូតមិនទាន់ក៏ជ្រុលទៅបុកនឹងរនាំងស័ង្កសីដែលគេដាក់បាំងការដ្ឋានសំណង់បណ្តាលឱ្យបាក់ខូចខាតទាំងស្រុង ចំណែកឯរថយន្តរងការខូចខាតផ្នែកខាងមុខ ភ្លាមនោះអ្នកបើកបររថយន្តបង្កបានបើករថយន្តរត់គេចខ្លួនបាត់ស្រមោល ។
ក្រោយពេលកើតហេតុសមត្ថកិច្ចជំនាញបានចុះមកធ្វើការស្ទូចយករថយន្តបង្កទៅរក្សាទុកនៅអធិការដ្ឋាននគរបាលខណ្ឌសែនសុខដើម្បីរងចាំម្ចាស់រថយន្តចូលខ្លួនមកធ្វើការដោះស្រាយនៅពេលក្រោយ ៕អត្ថបទ ទេព វណ្ណះ
