កីឡាករអេស្ប៉ាញ Nadal
តេន្នីស៖ កីឡាករវាយកូនបាល់លំដាប់ទី១ ពិភពលោក Rafael Nadal បានកក់កៅអីវគ្គ ៨នាក់ចុងក្រោយហើយនៃព្រឹត្តិការណ៍ Grand Slam, U.S.Open ជាលើកដំបូងក្នុងរយៈពេល ៤ឆ្នាំក្រោយ បន្ទាប់ពីជ័យជំនះលើកីឡាករអ៊ុយក្រែន Alexandr Dolgopolov បីសិតសូន្យ ៦-២, ៦-៤, ៦-១។
កីឡាករអេស្ប៉ាញ Rafael Nadal
ជើងឯក U.S.Open នេះពីរលើក Nadal កំពុងស្វែងរកជើងឯក Grand Slam ទីពីរក្នុងឆ្នាំនេះក្រោយឈ្នះជើងឯក French Open។ គូប្រកួតរបស់ Nadal នៅវគ្គ ៨នាក់ចុងក្រោយនោះគឺកីឡាករយុវជនរុស្ស៊ី Andrey Rublev ដែលទើបយកឈ្នះកីឡាករប៊ែលហ្ស៊ិក David Goffin ៧-៥, ៧-៦(៧-៥) និង ៦-៣។ Andrey Rublev បានក្លាយជាកីឡាករក្មេងបំផុតដែលឈានជើងចូលវគ្គ ៨នាក់ចុងក្រោយ U.S.Open នេះ បន្ទាប់ពី Andy Roddick ធ្វើបានបែបនេះចុងក្រោយបំផុតកាលពីឆ្នាំ២០០១។
កីឡាការិនីឆេក Karolina Pliskova
ដោយឡែកលទ្ធផលគូផ្សេងទៀតផ្នែកនារីកីឡាការិនីឆេក Karolina Pliskova បានយកឈ្នះកីឡាការិនីម្ចាស់ផ្ទះអាមេរិក Jennifer Brady ចំណាយពេលតែ ៥០នាទីប៉ុណ្ណោះលទ្ធផល ៦-១ និង ៦-០។ កីឡាការិនីលំដាប់ទីមួយរូបនេះ នឹងបន្តជួបកីឡាការិនីអាមេរិកមួយរូបទៀត Coco Vandeweghe ដែលយកឈ្នះ Lucie Safarova៕ប្រភព៖ Bayon TV