ប្រធានាធិបតីរុស្ស៊ី វ៉ា្លឌីមៀរ ពូទីន បានព្យាករណ៍ថា ៖ "ប្រទេសណាដែលរីកចម្រើនបច្ចេកវិទ្យា AI ប្រទេសនោះនឹងគ្រប់គ្រងពិភពលោកតែម្ដង" ។ ការលើកឡើងដូចនេះអំឡុងរូបលោកចូលរួមពិធីបើកបវេសនកាលថ្មីរបស់សាលានៅរុស្ស៊ីថ្ងៃទី ១ កញ្ញាកន្លងទៅដោយជជែកពីវិទ្យាសាស្ត្រជាមួយសិស្ស-និស្សិតអស់ទាំងនោះ។
ប្រធានាធិបតីវ័យ ៦៤ ឆ្នាំរូបនេះបន្តថា ៖ "បច្ចេកវិទ្យា AI គឺជាអនាគតហើយមិនមែនសម្រាប់តែរុស្ស៊ីប៉ុណ្ណោះទេ តែសម្រាប់មនុស្សជាតិទាំងអស់។ វានឹងផ្ដល់ឱកាសជាច្រើនប៉ុន្តែក៏មានគ្រោះថ្នាក់ច្រើនដែលមិនអាចមើលដឹងបានផងដែរ"។
ការអភិវឌ្ឍ AI បានក្លាយជាក្ដីកង្វល់សន្តិសុខជាតិកាន់តែខ្លាំងឡើងៗក្នុងរយៈពេលប៉ុន្មានឆ្នាំចុងក្រោយនេះ។ ជាក់ស្ដែងដូចជាចិន និងអាមេរិកដែលប្រទេសទាំងពីរនេះត្រូវបានគេមើលឃើញថាកំពុងប្រជែង AI ខណៈថ្មីៗចិននេះបានប្រកាសពីមហិច្ឆតារបស់ខ្លួនចង់ក្លាយជាប្រទេសឈានមុខគេលើបច្ចេកវិទ្យា AI នៅឆ្នាំ ២០៣០។ ចំណែកអាមេរិកឯណោះវិញអ្នកវិភាគជាច្រើនបានព្យាករណ៍ថានឹងស្ថិតនៅពីក្រោយចិនស្របពេលដែលរដ្ឋបាលលោកដូណាល់ ត្រាំ រៀបចំកាត់មូលនិធិសម្រាប់ទ្រទ្រង់ការស្រាវជ្រាវបច្ចេកវិទ្យា និងវិទ្យាសាស្ត្រ។
គួរបញ្ជាក់ថា វត្តមានបច្ចេកវិទ្យា AI នាពេលអអនាគតនឹងជួយជម្រុញសេដ្ឋកិច្ចប្រទេសជាតិក្នុងវិស័យមួយចំនួនដោយផ្ដើមចេញពីឧស្សាហកម្មធំៗរហូតដល់ការស្រាវជ្រាវសុខាភិបាល។ វានឹងត្រូវបានប្រើប្រាស់យ៉ាងទូលំទូលាយក្នុងហេតុការណ៍សង្គ្រាមដូចជាការបង្កើតអាវុធប្រព័ន្ធអ៊ីនធឺណិត គ្រប់គ្រងឧបករណ៍ស្វ័យប្រវត្តដូចជា ដ្រូនចម្បាំង និងអាចត្រូវបានប្រើប្រាស់ជាភ្នាក់ងារឃ្លាំមើលពិសេសដើម្បីវាយប្រហារគូបដិបក្ខ៕
ប្រភព៖ The Verge
