លោក ដួង ចាន់សារ៉ាត បានឲ្យដឹងថា នេះជាគំរោងថ្មីមួយរបស់រដ្ឋបាលរាជធានីភ្នំពេញដើម្បីរំដោះទឹកភ្លៀងចេញពីតំបន់ខាងលើនេះក្រោយពីចំណុចនេះតែងតែទទួលការជន់លិចដោយសារជំនន់ទឹកភ្លៀងព្រោះគ្មានប្រព័ន្ធលូ ។ លោកបន្តថា ការដាក់លូថ្មីចាប់ពីផ្លូវលេខ១៥៤ដល់ផ្សាររាត្រី ដោយចាប់អនុវត្តពីថ្ងៃទី១៧ ខែសីហា ឆ្នាំ២០១៧ ដោយដាក់រឺហ្គា២៥ម៉ែត្រមួយនឹងគ្រោងឲ្យរួចរាល់ក្នុងរយៈពេល២ខែដើម្បីរំដោះទឹកចេញពីផ្លូវហូរចូលអាងស្តុកទឹករបស់គំរោងជប៉ុន ។
លោកបានឲ្យដឹងទៀតថា ការងារស្ថាបនាប្រព័ន្ធលូថ្មីនេះធ្វើឡើងស្របគ្នានឹងគំរោងកែលម្អសួនច្បារមុខព្រះបរមរាជវាំងរបស់រដ្ឋបាលរាជធានីភ្នំពេញដែលកំពុងដំណើរស្ថាបនានាពេលនេះដោយប្តូរការរ៉ូចាស់ដាក់ជំនួសវិញដោយការរ៉ូថ្មក្រានីត ដើម្បីលើកកំពស់សោភណ្ឌភាពបរិស្ថានតាមដងទន្លេសាបមុខព្រះបរមរាជវាំងឲ្យកាន់តែស្រស់បំព្រង ជាទីតាំងលំហែរយកខ្យល់អាកាស និងហាត់ប្រាណរបស់បងប្អូនប្រជាពលរដ្ឋយើង ស្របពេលដែលទីតាំងជាច្រើនត្រូវបានប្តូរដាក់ថ្មក្រានីតរួចហើយ ធ្វើឲ្យសួនច្បារជាច្រើនក្នុងទីក្រុងត្រូវបានកែលម្អបំរើឲ្យសេចក្តីត្រូវការរបស់ប្រជាពលរដ្ឋ និងសុំឲ្យប្រជាពលរដ្ឋចូលរួមថែរក្សាការពារសមិទ្ធិផលដែលកើតមានសំរាប់បំរើផលប្រយោជន៏សាធារណៈក្នុងរាជធានីភ្នំពេញនេះផង ៕ អត្ថបទ: ទេព វណ្ណះ
