លុះរយៈពេលជិត១ឆ្នាំក្រោយមកគឺនៅវេលាម៉ោង៣ និង២០នាទី រសៀលថ្ងៃទី២៨ ខែសីហា ឆ្នាំ២០១៧នេះ បានប្រទះឃើញជននេះកំពុងស្ថិតនៅតាមផ្លុវបេតុង ក្នុងភូមិព្រៃទា សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ក៏បានប្ដឹងឲ្យនគរបាលចាប់ខ្លួនបាននាំទៅសាកសួរ និងចាត់ការតាមច្បាប់។ ជនសង្ស័យខាងលើនោះឈ្មោះ ចាន់ ផានិត អាយុ២៧ឆ្នាំ មុខរបរជាអ្នកហៅម៉ូយដាក់ខារ៉ាអូខេនៅតាមផ្លូវលេខ២០០៤ ស្នាក់នៅក្នុងភូមិព្រៃទា សង្កាត់ចោមចៅ ខណ្ឌពោធិ៍សែនជ័យ។ មានស្រុកកំណើតនៅក្នុងភូមិឫស្សី ឃុំមោងឫស្សី ស្រុកមោងឫស្សី ខេត្តបាត់ដំបង។ រីឯជនរងគ្រោះឈ្មោះ ឆែម អយ ភេទប្រុស អាយុ២៦ឆ្នាំ ស្នាក់នៅត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។
ម៉ូតូដែលបាត់នោះ ម៉ាកស៊ុយហ្ស៊ុយគីឡេត ស៊េរីឆ្នាំ២០១៣ ពណ៌ខ្មៅ មិនចាំស្លាកលេខ។ ចំណែកអ្នកធានាឈ្មោះ អុន ថានី ភេទប្រុស អាយុ៣១ឆ្នាំ ជាមេជាងដែក។ បុរសរងគ្រោះបានឲ្យដឹងថា នៅមុនពេលកើតហេតុរូបគេបានខ្ចីម៉ូតូប្អូនប្រុសបង្កើតរបស់ខ្លួន ជិះទៅកាន់ផ្សារដើមគរ ហើយពេលទៅដល់ត្រូវបានបុរសជាមេជាងឈ្មោះ អ៊ុន ថានី ពឹងពាក់ឲ្យជូនទៅយកលុយពីឈ្មោះ ចាន់ ផានិត នៅផ្លូវជាតិលេខ៤ ម្តុំស្តុបកែងផ្លូវអូរដឹមកប់ស្រូវ។ ពេលនោះដោយសារតែមេជាងពឹងហើយខ្លួនក៏បានជូនទៅហើយ ពេលទៅដល់ស្រាប់តែឈ្មោះ ចាន់ ផានិត បានខ្ចីម៉ូតូជិះដោយប្រាប់ថា ទៅផ្ទះប្អូនតែមួយភ្លែតប៉ុណ្ណោះ។ ពេលនោះខ្លួនមិនចង់ឲ្យទេ ដោយសារមិនសូវទុកចិត្តជននោះដែរ ម្យ៉ាងទៀត ឥឡូវនេះកើតមានសកម្មភាពឆបោកច្រើនណាស់ ប៉ុន្តែពេលនោះបុរសដែលជាមេជាងបានធានាខុសត្រូវនិងបង្ខំឲ្យម៉ូតូទៅជនសង្ស័យខ្ចី ទើបខ្លួនយល់ព្រមហើយក៏ស្រាប់តែជននោះជិះម៉ូតបាត់រហូតតែម្ដង។
ប្រភពដដែលបានបន្តទៀតថា ក្រោយពេលកើតហេតុខ្លួនបានតាមរកគ្រប់កន្លែង តែរកមិនឃើញឡើយ បន្ទាប់មកខ្លួនបានទៅប្ដឹងនគរបាលឲ្យជួយអន្តរាគមន៍។ លុះរយៈពេលជិត១ឆ្នាំក្រោយមកគឺនៅវេលាម៉ោង៣និង២០នាទីរសៀល ថ្ងៃទី២៨ ខែសីហា ឆ្នាំ២០១៧ បានប្រទះឃើញជននេះកំពុងស្ថិតនៅតាមផ្លូវបេតុង ក្នុងភូមិព្រៃទា សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ក៏បានប្ដឹងឲ្យនគរបាលចាប់ខ្លួនបាននាំទៅសាកសួរ និងចាត់ការតាមច្បាប់៕ អត្ថបទ: ទេព វណ្ណះ
