ថ្លែងនៅក្នុងជំនួបជាមួយ ឯកឧត្តមសភាចារ្យ អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី២៤ សីហាកន្លងមកនេះ លោក ក្សាត្រាប៉ាទី ស៊ីវ៉ាជី (Kshratrapati Shivaji) នាយកប្រតិបត្តិ នៃធនាគា ADB បានថ្លែងលើកឡើងថា សេដ្ឋកិច្ចកម្ពុជា មានការអភិវឌ្ឍរីកចម្រើនយ៉ាងឆាប់រហ័ស ជាពិសេសស្ថានភាពការរីកចម្រើននៃសេដ្ឋកិច្ច ដែលសម្រេចបានកំណើនក្នុងរង្វង់៧% ក្នុងរយៈពេល២ទសវត្ស មកនេះ ក្នុងនោះបើតាមការព្យាករណ៍ កំណើនសេដ្ឋកិច្ចនៅកម្ពុជា និងអាចសម្រេចបានប្រមាណ៦,៩% នៅក្នុងឆ្នាំ២០១៨ផងដែរ នេះគឺជាចក្ខុវិស័យចំពោះអនាគតកម្ពុជា ដែលនៅតែសម្រេចបានមានលក្ខណៈវិជ្ជមាន។
លោក បានលើកឡើងទៀតថា សេដ្ឋកិច្ចកម្ពុជាត្រូវបានរំពឹងថា នឹងរក្សាកំណើនសេដ្ឋកិច្ចរយៈពេលវែងប្រកបដោយចីរភាព ក្នុងរង្វង់៧% ក្នុងមួយឆ្នាំៗ និងបានកាត់បន្ថយភាពក្រីក្របានលើស១%ក្នុងមួយឆ្នាំផងដែរ។ ការបន្ត សម្រេចបានកំណើនសេដ្ឋកិច្ចខ្ពស់បែបនេះ នឹងធ្វើឲ្យចំណូលជាតិសរុបសម្រាប់ប្រជាជនម្នាក់ៗ កើនឡើងដល់១.៤៣៤ដុល្លារអាមេរិក នៅក្នុងឆ្នាំ២០១៧ និងអាចរក្សាបានអតិផរណាជាមធ្យមប្រចាំឆ្នាំ ស្ថិតក្នុងរង្វង់៣,៥% ក្នុងមួយឆ្នាំ ។
ឯកឧត្តមសភាចារ្យ អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានឲ្យដឹងថា ពាក់ព័ន្ធនឹងការផ្តល់ហិរញ្ញប្បទាន ចាប់តាំងពីឆ្នាំ១៩៩២ រហូតមកដល់ថ្ងៃទី៣១ ខែកក្កដា ឆ្នាំ២០១៧នេះ ធនាគារADB បានផ្តល់ហិរញ្ញប្បទានសហប្រតិបត្តិការ ដល់ប្រទេសកម្ពុជាមានទឹកប្រាក់សរុបប្រមាណ២.៥៧៤លាន ដុល្លារអាមេរិក ដែលបានប្រើប្រាស់សម្រាប់ធ្វើការវិនិយោគជាច្រើននៅកម្ពុជា។
ឯកឧត្តម ទេសរដ្ឋមន្ត្រី បានបញ្ជាក់ថា ចំនួនទឹកប្រាក់របស់ABD ដែលបានផ្តល់ ត្រូវបានយកមកអភិវឌ្ឍលើវិស័យមួយចំនួន រួមមាន វិស័យកសិកម្ម ធនធានធម្មជាតិ, វិស័យទឹកស្អាត និងហេដ្ឋារចនាសម្ព័ន្ធក្រុង, វិស័យគមនាគមន៍ និងបច្ចេកវិទ្យា ព័ត៌មាន, វិស័យឧស្សាហកម្ម និងពាណិជ្ជកម្ម, វិស័យហិរញ្ញវត្ថុ, វិស័យគ្រប់គ្រងសាធារណៈ, វិស័យអប់រំនឹងបណ្តុះ បណ្តាលបច្ចេកទេស និងវិជ្ជាជីវៈ, វិស័យសុខាភិបាល, វិស័យថាមពល និងពហុវិស័យ ដែលបានកំពុងចូលរួមចំណែក ដល់ការអភិវឌ្ឍ និងការកាត់បន្ថយភាពក្រីក្រនៅកម្ពុជាពិតប្រាកដ ៕ប្រភព៖ BayonTV
