ជនសង្ស័យទី១ជាអ្នកឆក់មានឈ្មោះ លឹម សុខសាន ភេទប្រុស អាយុ២៣ឆ្នាំ មុខរបរសន្តិសុខនៅបឹងត្របែកផ្លាហ្សា ស្នាក់នៅផ្ទះជួលផ្លូវលំ សង្កាត់បឹងទំពុន ខណ្ឌមានជ័យ ទី២មានឈ្មោះ ពិល ឈ្នួលដារ៉ា ភេទប្រុស អាយុ២២ឆ្នាំ មានមុខរបរជាងភ្លើង ស្នាក់នៅសង្កាត់បឹងទំពុង ខណ្ឌមានជ័យ ។
សាក្សីដែលជាអ្នករត់រ៉ឺម៉កម៉ូតូមានឈ្មោះ ព្រុំ សុធា ភេទប្រុស អាយុ៣៦ឆ្នាំ ស្នាក់នៅផ្ទះលេខ២៦៦A សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅឃុំធិបតី ស្រុកមោងឬស្សី ខេត្តបាត់ដំបង បានឲ្យដឹងថា មុនពេលកើតហេតុ គាត់បានដឹកភ្ញៀវជាជនជាតិបរទេសប្រុសស្រី២នាក់ឲ្យដឹកទៅម្តុំផ្លូវ៦៣ ខណៈមកដល់ចំណុចកើតហេតុផ្លូវ៣១០កែងផ្លូវ៦៣ ក៏ស្រាប់តែលេចមុខជនសង្ស័យ២នាក់ជិះម៉ូតូមួយគ្រឿងម៉ាកហុងដាឌ្រីម ស៊េរី២០១៧ ពណ៌ខ្មៅ ពាក់ស្លាកលេខ ភ្នំពេញ ១GL-៥៦០២ បើកបរតាមបណ្តោយផ្លូវ៣១០ ក្នុងទិសដៅពីកើតទៅលិច ហើយជិះទៅជិតធ្វើសកម្មភាពលូកដៃឆក់កាបូបពីស្ត្រីជនជាតិបរទេសតែឆក់មិនបានសម្រេច ភ្លាមៗនោះដែរ ម្ចាស់រ៉ឺម៉កម៉ូតូក្លាហានហ៊ានកៀរផ្តួលម៉ូតូជនសង្ស័យ ហើយឈប់ម៉ូតូក្របួចជាប់អ្នកឆក់ ចំណែកឯម្នាក់ទៀត ជាអ្នកបើកម៉ូតូរត់គេចខ្លួន សំណាងល្អសមត្ថកិច្ចប៉ុស្តិ៍បឹងកេងកង១ អន្តរាគមន៍ឃាត់បានម្នាក់ជាអ្នករត់ឌុប នៅផ្លូវ៣០៦យកទៅសួរនាំនៅប៉ុស្តិ៍នគរបាលបឹងកេងកង១ ។
រីឯជនជាតិបរទេសវិញ គាត់មិនបានទៅដាក់ពាក្យបណ្តឹងនោះទេ បានប្រាប់ឲ្យឌុបគាត់ទៅអូតែលបាត់ រួចម្ចាស់រ៉ឺម៉កម៉ូតូបានទៅធ្វើសាក្សីឲ្យនៅប៉ុស្តិ៍បឹងកេងកង១ ដើម្បីឲ្យសមត្ថកិច្ចចាត់ការទៅតាមនីតិវិធី ។ ជនសង្ស័យម្នាក់ ជាអ្នកឌុបបានឆ្លើយសារភាពប្រាប់សមត្ថកិច្ចថា ខ្លួនពិតជាបានធ្វើសកម្មភាពឌុបគេឆក់ពិតមែន ហើយធ្លាប់ធ្វើសកម្មភាពឆក់ចំនួន៣ដងមកហើយ ចំណែកឯម្នាក់ទៀតវិញ ក៏បានឆ្លើយសារភាពប្រាប់ដែលថា ទើបតែមួយដងនឹងទេ ។
ក្រោយពេលកើតហេតុ លោកមេប៉ុស្តិ៍បឹងកេងកង១ គាត់បានលើកទឹកចិត្តឲ្យម្ចាស់រ៉ឺម៉កម៉ូតូដែលចាប់បានជនសង្ស័យប្រគល់ឲ្យទឹកប្រាក់ចំនួន១០ម៉ឺនរៀល ឬឯជនសង្ស័យទាំង២នាក់វិញ ត្រូវសមត្ថកិច្ចកសាងសំណុំរឿងបញ្ចូនទៅកាន់តុលាការ ដើម្បីចាត់ការទៅនីតិវិធី ៕ អត្ថបទ: ទេព វណ្ណះ
