លោកឧត្តមសេនីយ៍ត្រី សេង ធារិន មេបញ្ជាការរង នាយសេនាធិការពលតូចថ្មើរជើងលេខ៥១ បានប្រាប់ឲ្យដឹងថា កងកម្លាំងទាហានរបស់លោក ក្រៅពីការងារការពារបូរណភាពទឹកដី កងកម្លាំងទាហានក៏បានជួយធ្វើអន្តរាគមន៍ ជួយដល់ប្រជាពលរដ្ឋដែលរងគ្រោះដោយធម្មជាតិ មានគ្រោះទឹកជំនន់ ខ្យល់ព្យុះ និងខ្យល់កន្ត្រាក់ ហើយជួយកសាងផ្ទះជូនប្រជាពលរដ្ឋ ដែលមានជីវភាពទីទាល់ក្រ និងប្រមូលផលច្រូតស្រូវជូនប្រជាបលរដ្ឋផងដែរ។
លោក សេង ធារិន បានបញ្ជាក់ឲ្យដឹងទៀតថា ដោយមានការណែនាំពីថ្នាក់ដឹកនាំយោធភូមិភាគទី៥ និងមេបញ្ជាការពលតូចថ្មើរជើងលេខ៥១ ឲ្យកងពលលេខ៥១ ទិញជ្រូកមកចិញ្ចឹម ដើម្បីផ្គត់ផ្គង់ទាហាននៅក្នុងបន្ទាយនោះ ទើបនៅថ្ងៃទី២៤ ខែសីហា ឆ្នាំ២០១៧ លោកបានទិញជ្រូកព្រៃពូជចំនួន២២ក្បាល ដើម្បីយកមកចិញ្ចឹមក្នុងកសិដ្ឋាន ក្នុងទីបញ្ជាការកងពលតូចថ្មើរជើងលេខ៥១ ស្ថិតភូមិភ្នំជញ្ជាំង ឃុំជប់វ៉ារី ស្រុកព្រះនេត្រព្រះ ខេត្តបន្ទាយមានជ័យ ដើម្បីធ្វើការផ្គត់ផ្គង់ទាហាននៅក្នុងបន្ទាយកុំឲ្យមានការខ្វះខាត។
គួរបញ្ជាក់ផងដែរថា លោក សេង ធារិន មេបញ្ជាការរង នាយសេនាធិការពលតូចថ្មើរជើងលេខ៥១ តែងតែយកចិត្តទុកដាក់ឲ្យកូនទាហាន ដាំបន្លែបង្ការ ចិញ្ចឹមសត្វ ត្រី ជ្រូក ជាបន្តបន្ទាប់ មិនឲ្យដាច់ម្ហូបក្នុងកងពលលេខ ៥១ របស់លោកឡើយ៕ អត្ថបទ: ទេព វណ្ណះ
