ហេតុការណ៍នោះបានកើតឡើងកាលពីវេលាម៉ោង៦ និង២០នាទីល្ងាច ថ្ងៃទី២៤ ខែសីហា ឆ្នាំ២០១៧ នៅលើកំណាត់ផ្លូវវេងស្រេង ត្រង់ចំណុចច្រកចូលរោងចក្រដំបូលខៀវ ស្ថិតនៅក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។ រថយន្តដឹកដែលម៉ាកហ៊ីយ៉ាន់ដាយ១គ្រឿងនោះ ពណ៌សលាយខៀវ ពាក់ស្លាកលេខភ្នំពេញ 3D-3804 បើកបរដោយបុរសម្នាក់ មិនស្គាល់ឈ្មោះ ហើយអ្នកខ្លះបាននិយាយថារថយន្តដឹកដែកបង្កការភ័យខ្លាចដល់អ្នកដំណើរតាមផ្លូវនេះ គឺជារបស់ក្រុមហ៊ុន លក់ដែកគ្រឿងសំណង់ អាយ អេស អាយ《ISI》។ តាមប្រភពព័ត៌មានបានឲ្យដឹងថា នៅមុនពេលកើតហេតុគេបានឃើញរថយន្តបង្ក១គ្រឿងនោះ ដឹកដែកទម្ងន់រាប់តោនហើយម្យ៉ាងទៀតដែកសុទ្ធតែវែងៗប្រវែងជាង១០ម៉ត្រឯណោះ ដែលវាវែងជាងទ្រុងរថយន្តទៅទៀត ហើយរថយន្តនោះបានបើកបរធ្វើដំណើរ តាមផ្លូវរោងចក្រដំបូលខៀវ សំដៅឡើងទៅកាន់ផ្លូវវេងស្រេង។
ក្នុងខណៈនោះដោយសារតែផ្ទុកធ្ងន់លើសចំណុះ ម្យ៉ាងដែកវែងផងនោះនៅពេលកំពុងបើកបរគេបានឃើញកង់មុខរថយន្តហើបៗមិនសូវជាប់ថ្នល់ឡើយ មិនតែប៉ុណ្ណោះអ្នកបើកបរក៏បើកក្នុងល្បឿនលឿនគួរសមដែរ។ ប្រភពខាងលើបានបន្តទៀតថា លុះពេលឡើងដល់លើកំណាត់ផ្លូវវេងស្រេង ក៏ស្រាប់តែបះហើបកង់មុខឡើងលើនៅកាត់ទទឹងផ្លូវវេងស្រេងនោះ និងធ្លាក់ដែករាយប៉ាយពេញផ្លូវបង្កឲ្យកកស្ទះចរាចរយ៉ាងខ្លាំង ព្រោះចំពេលចរាចរណ៍កំពុងមមាញឹក ជាពិសេសចំពេលដែលមន្ត្រីរាជការ និងកម្មករ តាមបណ្ដាស្ថាប័នក្រសួងមន្ទីរនានាចេញពីធ្វើការ ហើយធ្វើដំណើរឆ្លងកាត់ផ្លូវនោះផង។ភ្លាមនោះនគរបាលបានចុះទៅកាន់ទីនោះ និងបានឲ្យតំណាងក្រុមហ៊ុនលក់ដែកនោះយករថយន្តស្ទូចទៅស្ទូចយកដែកដែលធ្លាក់ចេញពីក្នុងរថយន្តមកលើផ្លូវចេញ ព្រមទាំងបើករថយន្តដឹកដែកនោះអែបខាង ទើបអាចសម្រួលចរាចរណ៍លែងមានការកកស្ទះ ហើយជាសំណាងណាស់ដែលមិនមានមនុស្សណាម្នាក់រងគ្រោះក្នុងហេតុការណ៍នោះឡើយ។
រថយន្តបង្កនោះមិនត្រូវបាននគរបាលឃាត់យកទៅរក្សាទុកនោះទេ ព្រោះយល់ថា មិនមានការប៉ះពាល់ ឬបង្កគ្រោះថ្នាក់ដល់អ្នកដទៃ ប៉ុន្តែមានមតិជាច្រើនបានលើកឡើងថា កាដឹកបែបនេះវាបានខុសលក្ខណៈបច្ចេកទេស ខុសនឹងច្បាប់ចរាចរណ៍ និងអាចបង្កគ្រោះថ្នាក់ដល់អ្នកដទៃគ្រប់ពេលបាន ថ្ងៃនេះមិនអីតែថ្ងៃក្រោយគង់តែមានបញ្ហាមិនខាន។ ដូច្នេះនគរបាលគួរតែឃាត់រថយន្តនេះនាំយកទៅរក្សាទុកដើម្បីធ្វើការអប់រំណែនាំដល់អ្នកបើកបរក៏ដូចជាម្ចាស់ក្រុមហ៊ុនខាងលើ ឲ្យចេះគោរពច្បាប់ និងផលប៉ះពាល់នានាដល់អ្នកដទៃផង ជាពិសេសគោរពច្បាប់ចរាចរណ៍ដូចជាអ្នកដទៃទូទៅផងដែរ៕ អត្ថបទ: ទេព វណ្ណះ
