ក្នុងឱកាសបិទវគ្គលំហាត់ហ្វឹកហ្វឺនសង្គ្រោះគ្រោះមហន្តរាយ នៅបញ្ជាការដ្ឋានទ័ពជើងទឹក រាជធានីភ្នំពេញ ឯកឧត្ដមនាយឧត្ដមនាវី ទៀ វិញ មេបញ្ជាការកងទ័ពជើងទឹក នៃកងយោធពលខេមរភូមិន្ទថ្លែងថា អស់រយៈពេលជាង ៤៥ថ្ងៃមកហើយ ដែលកងកម្លាំងទ័ពជើងទឹក បានធ្វើលំហាត់ហ្វឹកហ្វឺនលើផ្នែក វិន័យ លំហាត់បច្ចេកទេសប្រើប្រាស់ និងការថែរក្សារថយន្តសង្គ្រោះ អូរប័រ នាវា និងសម្ភារៈយោធាមួយចំនួនទៀត ព្រមទាំងធ្វើលំហាត់ហែលទឹកសង្គ្រោះ និងវិធានការចាត់តាំងនានាទៀត។
ឯកឧត្តម បញ្ជាក់ថា លំហាត់ហ្វឹកហ្វឺនសង្គ្រោះគ្រោះមហន្តរាយឆ្នាំនេះ បញ្ជាការដ្ឋានទ័ពជើងទឹក បានប្រើប្រាស់សម្ភារៈយោធាតិចជាងមុន ខណៈសម្ភារៈយោធាមួយចំនួនធំ មានអូប័រ នាវា រថយន្តសង្គ្រោះមួយភាគធំបានបញ្ជូនទៅត្រៀមសង្គ្រោះគ្រោះមហន្តរាយនៅខេត្តស្ទឹងត្រែង។
ឯកឧត្ដម ទៀ វិញ បញ្ជាក់ថា បន្ទាប់ពីបានធ្វើលំហាត់ហ្វឹកហ្វឺនសង្គ្រោះមហន្តរាយនេះ មកដល់ពេលនេះ បញ្ជាការដ្ឋានទ័ពជើងទឹកមានកំលាំងគ្រប់គ្រាន់ និងសមត្ថភាព ដើម្បីត្រៀមជួយសង្គ្រោះគ្រោះមហន្តរាយ ដែលនឹងអាចកើតមានខាងមុខ ហើយកងកម្លាំងទ័ពជើងទឹករងចាំបទបញ្ជា ពីថ្នាក់ដឹកនាំក្រសួងការពារជាតិ និងអគ្គបញ្ជាការកងយោធពលខេមរភូមិន្ទ ដើម្បីចុះបំពេញបេសកកម្មសង្គ្រោះមហន្តរាយនានាដើម្បីសង្គ្រោះប្រជាពលរដ្ឋជួបការរងគ្រោះនានាដោយសារកត្តាធម្មជាតិ កត្តានានាទៀត៕ ប្រភព៖ BayonTV
