បើតាមវិមានប្រធានាធិបតីកូរ៉េខាងត្បូង Blue House ថ្លែងក្នុងអំឡុងកិច្ចប្រជុំជាមួយបណ្តាមន្រ្តីជាន់ខ្ពស់របស់លោក លោក មូន បាននិយាយយ៉ាងដូច្នេះថា «ជាការសម្តែងនូវការគាំទ្ររបស់យើងដល់មេដឹកនាំទាំងពីរ ពួកយើងជូនពរឲ្យកិច្ចប្រជុំកំពូលនាសប្តាហ៍នេះ ទទួលបានជោគជ័យ»។ នាឱកាសនោះ លោក មូន បានសរសើរលោក ត្រាំ សម្រាប់កិច្ចប្រឹងប្រែងផ្នែកការទូតរបស់លោក ដែលសំដៅស្វែងរកសុខសន្តិភាពនៅឧបទ្វីបកូរ៉េ និងសាទរលោក គីម សម្រាប់ការប្តេជ្ញារបស់លោក ក្នុងការដឹកនាំកូរ៉េខាងជើងឆ្ពោះទៅរកអនាគតភ្លឺស្វាងមួយ។
គួរបញ្ជាក់ថា៖ កិច្ចប្រជុំកំពូលលើកទីពីររវាង លោក ត្រាំ និង លោក គីម នឹងត្រូវរៀបចំឡើងពីថ្ងៃទី២៧ដល់ទី២៨ ខែកុម្ភៈនេះ នៅឯទីក្រុងហាណូយ ដែលកំពុងស្ថិតក្រោមការរឹតបន្តឹងសន្តិសុខយ៉ាងរឹងមាំ ខណៈមេដឹកនាំទាំងពីរត្រូវគេរំពឹងថា នឹងទៅដល់រដ្ឋធានីនៃប្រទេសវៀតណាមនៅថ្ងៃអង្គារ៕
