សម្តេច នាយក​រដ្ឋមន្រ្តី​​កម្ពុជា​​អំពាវនាវ​​ឲ្យ​​ពលរដ្ឋ​​ទៅ​​ឆ្លងឆ្នាំ​​នៅ​​វិមាន​​ឈ្នះ​ឈ្នះ​​!!!​​

ភ្នំពេញ៖ សម្តេច នាយករដ្ឋមន្រ្តី​ហ៊ុន សែន ​ ​នឹង​ចូលរួម​ឆ្លង​ឆ្នាំសកល​ ២០១៨​ ចូលឆ្នាំ ​២០១៩ ​នៅ​វិមាន​ឈ្នះ​ឈ្នះ ​ដែល​ទើប​បើក​សម្ពោធ​កាល​ពី​ថ្ងៃទី​ ២៩​ ធ្នូ ​កន្លង​ទៅ​ថ្មីៗ​នេះ​។ ជាមួយគ្នា​នេះ​សម្តេច នាយករដ្ឋមន្រ្តី​ហ៊ុន សែន ​ក៏​បាន​អំពាវនាវ​ដល់​ជន​រួមជាតិ ​ទេសចរ​ជាតិ​និង​អន្តរជាតិ ​ព្រម​ទាំង​យុវជន​ ចូលរួម​ឆ្លង​ឆ្នាំ​សកល​នៅ​វិមាន​ឈ្នះ ឈ្នះ​​ជាមួយ​លោក​ឲ្យ​បាន​ច្រើន​កុះករ។​ តាម​សម្តេច នាយករដ្ឋមន្រ្តី ​ការ​ទៅ​ចូលរួម​ឆ្លងឆ្នាំ​នៅ​វិមាន​ឈ្នះ ឈ្នះ ​គឺ​ជា​ឱកាស​ដើម្បី​ឲ្យ​ប្រជាពលរដ្ឋ​បាន​ឃើញ​ច្បាស់​នូវ​សោភ័ណភាព​នៃ​វិមាន​ដែល​ជា​ប្រវត្តិសាស្រ្ត​របស់​កម្ពុជា​នា​ពេល​រាត្រី​។

ជាមួយ​នឹង​ការ​អំពាវនាវ​នេះ ​លោក​ប្រមុខ​រដ្ឋាភិបាល​កម្ពុជា​ក៏​បាន​ជូនពរ​ប្រជាពលរដ្ឋ​កម្ពុជា​តាម​រយៈ​ទំព័រ​ហ្វេសប៊ុក​ផ្លូវការ​របស់​សម្តេច​ផងដែរ​។ ​សម្តេច ​ជូនពរ​ប្រជាពលរដ្ឋ​កម្ពុជា ​និង​កងទ័ព​ជាតិ​ដែល​កំពុង​ឈរជើង​ការពារ​ទឹកដី​នៅតាម​ព្រំដែន ​ជួបតែ​សេចក្តី​សុខ ​សុខភាព​ល្អ ​និង​ទទួល​បាន​ជោគជ័យ​ក្នុង​ការងារ​និង​មុខរបរ​នៅ​ក្នុង​ឆ្នាំថ្មី​ឆ្នាំ​២០១៩​។

គួរ​បញ្ជាក់​ឲ្យ​ដឹង​ថា ​នៅ​ឆ្នាំនេះ ​រដ្ឋាភិបាល​កម្ពុជា​បាន​រៀបចំ​ព្រឹត្តិការណ៍​សម្ពោធ​វិមាន​ឈ្នះឈ្នះ ​និង​ពិធី​អបអរសាទរ​ឆ្លង​ឆ្នាំចាស់​ចូលឆ្នាំ​ថ្មី​ជាមួយគ្នា​រយៈពេល​បី​ថ្ងៃ​គឺ​ចាប់​ពី​ថ្ងៃ​ទី២៩ ​ដល់​ថ្ងៃ​ទី៣១​ ធ្នូ។​ វិមាន​អនុស្សាវរីយ៍ ​«នយោបាយ​ឈ្នះ​ឈ្នះ​» នេះ​ត្រូវ​បាន​សាងសង់​ឡើង ​ដើម្បី​ជា​និមិត្តរូប​ការ​បង្រួបបង្រួម​ជាតិ ​បិទ​បញ្ចប់​នូវភ្លើង​សង្គ្រាម ​និង​នាំ​មក​នូវ​សុខ​សន្តិភាព​នៅក្នុង​ប្រទេស​កម្ពុជា​។ ​នៅក្នុង​រយៈពេល​ពីរ​ថ្ងៃ​មក​នេះ ​នៅ​វិមាន​ឈ្នះឈ្នះ​មាន​ការ​ប្រគុំ​តន្រ្តី​ជា​បន្តបន្ទាប់ ​ដើម្បី​បង្ក​ភាព​សប្បាយ​រីករាយ​ដល់​ប្រជាពលរដ្ឋ ​និង​ភ្ញៀវ​ទេសចរ​អន្តរជាតិ​ដែល​បាន​ទៅ​លេង​កម្សាន្ត​នៅ​វិមាន​ឈ្នះឈ្នះ​។

សម្រាប់​នៅ​រាត្រី​នេះ ​ក៏​មាន​កម្មវិធី​ប្រគុំ​តន្រ្តី ​ការ​តាំង​ពិព័រណ៍​ជាច្រើន ​ព្រមទាំង​ពិធី​បាញ់​កាំជ្រួច​ឆ្លង​ឆ្នាំ​ផងដែរ​។ ​ចំពោះ​វត្ថុ​អនុស្សាវរីយ៍ ​និង​ម្ហូបអាហារ​វិញ ​គឺ​មាន​លក់​ត្រៀបត្រា​នៅតាម​ស្តង់​ក្នុង​បរិវេណ​វិមាន​ឈ្នះ ឈ្នះ​។ នេះ​បើ​តាម​បញ្ជាក់​ឲ្យ​ដឹង​ពី​សម្តេច ​នាយករដ្ឋមន្រ្តី​ហ៊ុន សែន​។ ​ចំពោះ​ការ​បាញ់កាំជ្រួច​ សាលា​រាជធានី​ភ្នំពេញ​បាន​អះអាង​ថា ​នឹង​ធ្វើឡើង​ពេញ​មួយ​ម៉ោង​តែ​ម្តង​៕(អត្ថបទដោយ ទេព វណ្ណះ)
សម្តេច នាយក​រដ្ឋមន្រ្តី​​កម្ពុជា​​អំពាវនាវ​​ឲ្យ​​ពលរដ្ឋ​​ទៅ​​ឆ្លងឆ្នាំ​​នៅ​​វិមាន​​ឈ្នះ​ឈ្នះ​​!!!​​ សម្តេច នាយក​រដ្ឋមន្រ្តី​​កម្ពុជា​​អំពាវនាវ​​ឲ្យ​​ពលរដ្ឋ​​ទៅ​​ឆ្លងឆ្នាំ​​នៅ​​វិមាន​​ឈ្នះ​ឈ្នះ​​!!!​​ Reviewed by Soeurm Ro on 1/01/2019 Rating: 5
Powered by Blogger.