អាជ្ញាធរ​កំពង់​ឆ្នាំង ឲ្យ​វៀតណាម​ជិត​៨០០​គ្រួសារ បន្ត​ស្នាក់​នៅ​លើ​បឹង​ទន្លេ​សាប​រហូត​ដល់​ពាក់​កណ្ដាល​ឆ្នាំ​ក្រោយ!!!​

ខេត្តកំពង់ឆ្នាំង៖ អាជ្ញាធរខេត្តកំពង់ឆ្នាំង បានអនុញ្ញាត​ឲ្យពលរដ្ឋវៀតណាមជិត៨០០គ្រួសារ បន្ត​ស្នាក់នៅប​ណ្ដោះ​អាសន្ននៅ​លើ​ផ្ទៃ​បឹង​ទន្លេ​សាប​រហូតដល់ពាក់កណ្ដាលឆ្នាំ២០១៩។ បើ​តាម​អាជ្ញាធរ ការ​អនុញ្ញាត​នេះធ្វើឡើងតែ​សម្រាប់​ពលរដ្ឋ​ដែល​មាន​កន្លែង​ចិញ្ចឹម​ត្រី​លើ​បឹង​ទន្លេ​សាប​ប៉ុណ្ណោះ ខណៈ​អ្នក​ដែល​​ពុំមានកន្លែងចិញ្ចឹមត្រី​ជាង​១២០០​គ្រួសារ​ ត្រូវ​អាជ្ញាធរ​បញ្ជូនឡើង​គោក ឲ្យ​ទៅ​រស់នៅកន្លែងថ្មីរួច​ស្រេច​អស់​ហើយ​។

អភិបាល​រង​ខេត្ត​កំពង់ឆ្នាំង លោក ស៊ុន សុវណ្ណារិទ្ធ បាន​ប្រាប់នៅ​ថ្ងៃ​ព្រហស្បតិ៍​នេះ​ថា ការណ៍​ដែល​អាជ្ញាធរ​ខេត្ត​កំពង់ឆ្នាំង ឲ្យ​ពលរដ្ឋ​ជិត​៨០០​គ្រួសារ​ក្នុង​ចំណោម​ពលរដ្ឋ​សរុប​ជាង​២ពាន់​គ្រួសារ បន្ត​ស្នាក់​នៅ​បណ្ដោះ​អាសន្ន ក្នុង​ទីតាំង​៦​គោល​ដៅ​ នៅ​លើ​ផ្ទៃ​ទឹក​នៃ​បឹង​ទន្លេ​សាប​នេះ ព្រោះ​ចង់​ទុក​ពេល​ឲ្យ​ពួក​គេ​មាន​ពេល​វេលា​គ្រប់​គ្រាន់​ដើម្បី​ផ្លាស់​មក​រស់​នៅ​កន្លែង​ថ្មី និង​កុំ​ឲ្យ​ប៉ះ​ពាល់​ដល់​មុខ​របរ​ចិញ្ចឹម​ត្រី​។

លោក សន ជ័យ ប្រធាន​អង្គការ​សម្ព័ន្ធ​គណនេយ្យ​ភាព​សង្គម​យល់​ថា នេះ​ជា​ហេតុ​ផល​មួយ​មិន​សមរម្យ ដែល​អាជ្ញាធរ​បន្ត​អនុគ្រោះ​ដល់​ជន​ជាតិ​វៀតណាម​ទាំង​នោះ​ស្នាក់​នៅ​ដល់​ពាក់​កណ្ដាល​ឆ្នាំ​ក្រោយ​។ មិន​សមរម្យ​ព្រោះ​ថា ការ​ចិញ្ចឹម​ត្រី​មិន​ប៉ះ​ពាល់​ដល់​ការ​ប្ដូរ​កន្លែង​រស់​នៅ​ទេ​។ ដូច្នេះ លោក សន ជ័យ នៅ​មាន​ក្ដី​ព្រួយ​បារម្ភ​ពី ការ​ធ្វើ​ឲ្យ​ខូច​ខាត​ដល់​ផល​ប្រយោជន៍​ធន​ធាន​ធម្មជាតិ​របស់​ខ្មែរ តាម​រយៈ​ការ​បោះ​កាក​សំណល់​ចោល​ទៅ​ក្នុង​ទឹក ការ​បង្ហៀរ​ប្រេង​ម៉ាស៊ីន​កាណូតជា​រៀង​រាល់​ថ្ងៃ និង​ការ​បំពុល​បរិស្ថាន​ផ្សេងៗ​ទៀត​។

យ៉ាង​ណា​ក៏​ដោយ ​អាជ្ញាធរខេត្ត​កំពង់ឆ្នាំង បាន​ពន្យល់ថា ការ​អនុញ្ញាត​នេះធ្វើឡើងតែ​សម្រាប់​ពលរដ្ឋ​ដែល​មាន​កន្លែង​ចិញ្ចឹម​ត្រី​លើ​បឹង​ទន្លេ​សាប​ប៉ុណ្ណោះ ខណៈ​អ្នក​ដែល​​ពុំមានកន្លែងចិញ្ចឹមត្រី​ជាង​១២០០​គ្រួសារ​ ត្រូវ​អាជ្ញាធរ​បញ្ជូនឡើង​គោក ឲ្យ​ទៅ​រស់នៅកន្លែងថ្មីរួច​ស្រេច​អស់​ហើយ​។ បើ​តាម​អាជ្ញាធរ​ដដែល ពលរដ្ឋ​ទាំង​វៀតណាម ឥស្លាម និងខ្មែរ ដែល​ចាក​ចេញ​ពី​បឹង​ទន្លេ​សាប​នា​ពេល​កន្លង​មក កំពុង​រស់​នៅ​លើ​គោក ដែល​អាជ្ញាធរ​កំពុង​សម្រុក​រៀប​ចំ​រចនា​សម្ព័ន្ធ​ថ្មី ដោយ​រួម​មាន៖ ការ​ចាក់​ដី​ស្ថាបនា​ថ្នល់ ការ​ត​បណ្ដាញ​ទឹក ភ្លើង រួម​នឹង​ការ​សាង​សង់​សាលារៀន និង​មន្ទីរ​ពេទ្យ​ជា​ដើម​ ក្រោម​ការ​សម្រប​សម្រួល​ពី​សមាគម​វៀត​ណាម​ប្រចាំ​នៅ​កម្ពុជា​។

សូម​ជម្រាប​ថា ការ​ផ្លាស់​ទី​ជនជាតិ​វៀតណាម​ឡើង​មក​នៅ​លើ​គោក​នេះ ស្ថិត​នៅ​ក្នុង​ផែន​ការ​ការងារ​៥​ឆ្នាំ​របស់ខេត្តកំពង់​ឆ្នាំង ចាប់​ពី​ឆ្នាំ​២០១៥​ដល់​ឆ្នាំ​២០១៩។ ជន​ជាតិ​វៀតណាម​ជាង២០០០​គ្រួសារ​នេះ ផ្លាស់​ទី​ចេញ​ពី​គោល​ដៅ​ចំនួន​៦​នៅ​ទូទាំង​ខេត្ត​កំពង់​ឆ្នាំង រួមមាន៖ ឃុំ​ឆ្នុកទ្រូ ឃុំ​កំពង់​ប្រាសាទ ស្រុក​កំពង់​លែង និង​ក្រុង​កំពង់​ឆ្នាំង ទៅរស់នៅកន្លែងថ្មី ស្ថិតនៅឃុំស្វា​យ​ជ្រំ​ ស្រុក​រលាប្អៀរ ដែល​មាន​ចម្ងាយ​២គីឡូម៉ែត្រ​ពី​ទន្លេ​ដែល​ជា​ទី​តាំង​ចាស់​។ ចំពោះ​ទីតាំង​ចាស់​លើ​បឹង​ទន្លេ​សាប អាជ្ញាធរ​មាន​គម្រោង​រៀបចំឲ្យ​ទៅ​ជា​កន្លែង​ចិញ្ចឹមត្រី​តាម​លក្ខណៈ​ស្តង់​ដា ដើម្បី​ប្រែក្លាយ​ផ្ទៃ​បឹង​ទន្លេសាប​នៃ​ខេត្ត​កំពង់ឆ្នាំង ទៅ​តំបន់​ទេចរណ៍​នា​ពេល​អនាគត ជំនួស​ឲ្យ​ការ​រស់​នៅ​ពាស​វាល​ពាស​កាល​ដូច​ពេល​កន្លង​មក​។ បន្ថែម​ពី​លើ​កន្លែង​ចិញ្ចឹម​ត្រី ក៏​មាន​ដែរ​ភោជនីយដ្ឋាន​តាម​បែប​បរិស្ថាន​នៅ​លើ​ផ្ទៃ​ទន្លេ​ តែ​យ៉ាង​ណា​មិញ​គម្រោង​នេះ កំពុង​ស្ថិត​នៅ​ក្នុង​ដំណាក់​ការ​សិក្សា​នៅ​ឡើយ​៕ (អត្ថបទដោយ ទេព វណ្ណះ)
អាជ្ញាធរ​កំពង់​ឆ្នាំង ឲ្យ​វៀតណាម​ជិត​៨០០​គ្រួសារ បន្ត​ស្នាក់​នៅ​លើ​បឹង​ទន្លេ​សាប​រហូត​ដល់​ពាក់​កណ្ដាល​ឆ្នាំ​ក្រោយ!!!​ អាជ្ញាធរ​កំពង់​ឆ្នាំង ឲ្យ​វៀតណាម​ជិត​៨០០​គ្រួសារ បន្ត​ស្នាក់​នៅ​លើ​បឹង​ទន្លេ​សាប​រហូត​ដល់​ពាក់​កណ្ដាល​ឆ្នាំ​ក្រោយ!!!​ Reviewed by Soeurm Ro on 12/26/2018 Rating: 5
Powered by Blogger.