ញត្តិប្តឹង​រដ្ឋាភិបាល​បារាំង មិនដោះស្រាយ​រឿងបរិស្ថាន មាន​អ្នក​ចូលរួម​១លាន​៥សែន​នាក់!!!

បារាំង​៖​ ញត្តិ​ទាមទារ​ប្តឹង​រដ្ឋាភិបាល​បារាំង​ ចំពោះ​ការ​យឺតយ៉ាវ​ចាត់​វិធានការ​គាំពារ​បរិស្ថាន​ធម្មជាតិ គឺផ្តួច​ផ្តើម​ដោយ​អង្គការ​អន្តរជាតិ​ចំនួន​បួន​ គឺ​អង្គការ​ Greenpeace, Oxfam, Notre Affaire និង​ មូលនិធិ​ដើម្បី​ធម្មជាតិ​និង​មនុស្ស។ ញត្តិ​នេះ ត្រូវ​គេបង្ហោះ​តាម​គេហទំព័រ​អ៊ីនធឺនែត ​ឈ្មោះថា laffairedusiecle.net នាយិកា​អង្គការ​ Oxfam នៅ​បារាំង លើកឡើងថា ការ​ចូលរួម​ចុះ​ឈ្មោះ​ក្នុង​ញត្តិ​ប្តឹង​រដ្ឋាភិបាល​នេះ មា​នចំនួន​ច្រើន​លើសពី​ការ​រំពឹងទុក ហើយ​កើន​ឡើង​យ៉ាង​ឆាប់​រហ័ស​។ ចំណែកប្រធានអង្គការ Notre Affaire សង្កត់ធ្ងន់ថា ការ​ប្រែប្រួល​អាកាស​ធាតុ​និង​ជីវៈចម្រុះ​ គឺជា​ក្តី​បារម្ភ​ខ្លាំង​របស់​ពលរដ្ឋ។​

បើ​តាម​អង្គការ​ទាំងបួនខាង​លើ នៅ​ថ្ងៃ​ច័ន្ទ​ស្អែក​នេះ ពួក​គេ​នឹង​ដាក់​របាយ​ការណ៍អង្កេត​​លម្អិត​មួយ​ជូន​​រដ្ឋាភិបាល​បារាំង ស្តីពី​រឿង​បរិស្ថាន​ធម្មជាតិ​នេះ ហើយ​ទុក​ពេល​ចំនួន​២ខែ​ ឲ្យ​រដ្ឋាភិបាល​រក​ចម្លើយ​ដោះស្រាយ​បញ្ហា។ ចំពោះ​ពួក​គេ​ គេ​មិន​ចង់​ស្តាប់​ការ​ជជែក​ដោះសាតទៀត​នោះទេ គឺ​គេ​ចង់​ឃើញ​សកម្មភាព​ការងារ​ជាក់ស្តែង។​ ជាបន្តទៀត នៅ​ខែ​មីនា ឆ្នាំ​២០១៩ ពួក​គេ​នឹងដាក់​ពាក្យ​​ប្តឹង​ទៅ​តុលាការ​រដ្ឋបាល​បារាំង​តែម្តង​។

គួរ​ជ្រាប​ថា ការ​ប្តឹង​រដ្ឋាភិបាល​ចំពោះ​ការ​មិន​យកចិត្ត​ទុកដាក់​រឿង​បរិស្ថាន ឬ​ប្តឹង​ចំពោះ​ការ​ចាត់​វិធាន​ការ​យឺតយ៉ាវ​ចំពោះ​កិច្ច​គាំពារ​ធម្មជាតិ គឺ​ធ្លាប់​មានប្រវត្តិ​ឈ្នះ​ក្តី​ម្តង​រួច​ហើយ នៅ​ប្រទេស​ហូឡង់។ អង្គការ​មួយ​ឈ្មោះ​ Urgenda ដែល​ចូល​រួម​ដោយ​ពលរដ្ឋ​ប្រមាណ​​៩០០នាក់ បាន​ប្តឹង​រដ្ឋាភិបាល​ហូឡង់ ហើយ​ទីបំផុត តុលាការ​ហូឡង់​ បានសម្រេច​ឲ្យ​រដ្ឋាភិបាល ​ចាត់​វិធានការ​កាត់​បន្ថយ​ ការ​បំពុល​បរិកាសដោយ​ឧស្ម័នផ្ទះ​កញ្ចក់ ឲ្យ​បាន​២៥ភាគរយ នៅឆ្នាំត្រឹម​ឆ្នាំ​២០២០៕ (អត្ថបទដកស្រង់ដោយ ទេព វណ្ណះ)
ញត្តិប្តឹង​រដ្ឋាភិបាល​បារាំង មិនដោះស្រាយ​រឿងបរិស្ថាន មាន​អ្នក​ចូលរួម​១លាន​៥សែន​នាក់!!! ញត្តិប្តឹង​រដ្ឋាភិបាល​បារាំង មិនដោះស្រាយ​រឿងបរិស្ថាន មាន​អ្នក​ចូលរួម​១លាន​៥សែន​នាក់!!! Reviewed by Soeurm Ro on 12/23/2018 Rating: 5
Powered by Blogger.