លោក ឃឹម ប៊ុនសុង ត្រូវបានព្រះមហាក្សត្រចេញព្រះរាជក្រឹត្យ តម្លើងឋានន្តរស័ក្តិថ្នាក់ ​​នាយឧត្តមសេនីយ៍ និងតែងតាំងជារដ្ឋលេខាធិការក្រសួងការពារជាតិ

(ភ្នំពេញ)៖ លោក ឃឹម ប៊ុនសុង អភិបាលខេត្តសៀមរាប ត្រូវបានព្រះមហាក្សត្រ ចេញព្រះរាជក្រឹត្យត្រាស់បង្គាប់តម្លើងឋានន្ដរស័ក្ដិថ្នាក់ នាយឧត្តមសេនីយ៍ និងតែងតាំង រដ្ឋលេខាធិការក្រសួងការពារជាតិ បន្ទាប់ពីលោកត្រូវបានចូលនិវត្តន៍ពីអភិបាលខេត្តសៀមរាប។

ពិធីប្រកាសតែងតាំង នឹងត្រូវធ្វើឡើងនៅថ្ងៃទី០១ ខែមករា ឆ្នាំ២០១៩ខាងមុខនេះ ប្រសិនបើមិនមានអ្វីប្រែប្រួលទេនោះ។

សូមបញ្ជាក់ថា៖ ព្រះករុណា ព្រះបាទ សម្តេច ព្រះបរមនាថ នរោត្តម សីហមុនី ព្រះមហាក្សត្រកម្ពុជា បានចេញព្រះរាជក្រឹត្យមួយតែងតាំង លោក ទៀ សីហា ជាអភិបាលខេត្តសៀមរាប ជំនួសលោក ឃឹម ប៊ុនសុង ដែលចូលនិវត្តន៍។

លោក ទៀ សីហា ដែលជា​កូនរបស់សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្ត្រី​ក្រសួងការពារជាតិ ត្រូវបានរាជរដ្ឋាភិបាលតែងតាំងជា ​អភិបាលរង​ខេត្តសៀមរាប កាលពីខែសីហា ឆ្នាំ២០១៧៕​