សម្តេច ហេង សំរិន ចេញ​សៀវភៅ​ជា​ភាសា​អង់គ្លេស​រៀប​រាប់​ពី​ការ​តស៊ូ​រំដោះ​ជាតិ​និង​ប្រជាជន​ពី​របប​ - សមាគម វិទ្យុ​ និងទូរទស្សន៍សំលេងជនពិការភ្នែក (VOB)

Mobile Menu

Top Ads

ចន្លោះទំនេរ សម្រាប់ដាក់ពាណិជ្ជកម្ម

អត្ថបទ និងព័ត៌មានថ្មីៗ

logoblog

សម្តេច ហេង សំរិន ចេញ​សៀវភៅ​ជា​ភាសា​អង់គ្លេស​រៀប​រាប់​ពី​ការ​តស៊ូ​រំដោះ​ជាតិ​និង​ប្រជាជន​ពី​របប​

27/11/2018
សៀវភៅ៖ ការ​សម្ពោធ​និង​ផ្សព្វ​ផ្សាយ​នូវ​សៀវភៅ ការ​តស៊ូ​របស់​ប្រជាជន៖ កម្ពុជា​រស់​ឡើង​វិញ របស់​សម្តេច ​ហេង សំរិន ប្រធាន​រដ្ឋ​សភា​កម្ពុជា​នៅ​ពេល​នេះ គឺ​ធ្វើ​ឡើង​មុន​ពេល​កម្ពុជា​នឹង​ប្រារព្ធ​ខួប​លើក​ទី៤០​ឆ្នាំ​នៃ​ថ្ងៃ​បង្កើត​រណសិរ្ស​សាមគ្គី​សង្រ្គោះ​ជាតិ​កម្ពុជា​នៅ​ស្តូប​អនុស្សាវរីយ៍ នា​ស្រុក​ស្នួល ខេត្ត​ក្រចេះ​នៅ​ថ្ងៃ​ទី២ ខែធ្នូ ឆ្នាំ២០១៨ ខាង​មុខ​នេះ​។ ពិធី​ប្រារព្ធ​ខួប​លើក​ទី៤០​ឆ្នាំ​នៃ​ថ្ងៃ​បង្កើត​រណសិរ្ស​នេះ នឹង​មាន​ការ​ចូល​រួម​ដោយ​ផ្ទាល់​សម្តេច ​ហេង សំរិន តែ​ម្តង​។

សៀវភៅ ការ​តស៊ូ​របស់​ប្រជាជន​៖កម្ពុជា​រស់​ឡើង​វិញ ត្រូវ​បាន​ចង​ក្រង​ឡើង​ជា​ភាសាអង់គ្លេស​ដោយ​បង្ហាញ​ពី​ការ​ពិត​នៃ​សង្គ្រាម​នៅ​ប្រទេស​កម្ពុជា​ទៅ​ដល់​អ្នក​អាន និង​កូន​ខ្មែរ​ជំនាន់​ក្រោយ ដែល​ចង់​សិក្សា​ស្វែង​យល់​ពី​ប្រវត្តិ​សាស្រ្ត​។ ជា​ប្រវត្តិ​សាស្រ្ត​នៃ​ការ​តស៊ូ​រំដោះ​ប្រទេស​ជាតិ​របស់​ឥស្សរ​ជន​ស្នេហា​ជាតិ និង​ដំណើរ ស្តារ​កម្ពុជា​ឡើង​វិញ ក្រោយ​របប​ប្រល័យ​ពូជ​សាសន៍ ប៉ុល ពត ។ នេះ​បើ​តាម​ការ​បញ្ជាក់​របស់​សម្តេច ​ហេង សំរិន នៅ​លើ​ទំព័រ​ហ្វេស​ប៊ុក​របស់​សម្តេច​នៅ​ថ្ងៃ​នេះ​។

សៀវភៅ​នេះ ក៏​បាន​រៀប​រាប់​ផង​ដែរ​ពី​ជីវ​ប្រវត្តិ​របស់​សម្តេច ហេង សំរិន ដោយ​សរសេរ​ថា ប្រសូត្រ​នៅ​ក្នុង​គ្រួសារ​កសិករ​នៅ​ទី​ជន​បទ​មួយ​ក្នុង​ខេត្ត​កំពង់ចាម​ក្នុង​ឆ្នាំ​១៩៣៤ សម្រេច ហេង សំរិន គឺ​ជា​ប្រធាន​ស្ថាបនិក​ចលនា​មហាជន​ធំ​មួយ​ឈ្មោះ​ថា “រណសិរ្ស​សាមគ្គី​សង្គ្រោះ​ជាតិ​កម្ពុជា“ ។ ក្រោយ​មក រណសិរ្យ​នេះ បាន​ប្តូរ​ឈ្មោះ​ជា “រណសិរ្ស​សាមគ្គី​អភិវឌ្ឍន៍​មាតុ​ភូមិ​កម្ពុជា” ដែល​បាន​បង្កើត​ឡើង​នៅ​ក្នុង​ខេត្ត​ក្រចេះ កាល​ពី​ថ្ងៃ​ទី២ ខែ​ធ្នូ ឆ្នាំ​១៩៧៨។ គឺ​ផ្តើម​ចេញ​ពី​ខេត្ត​ក្រចេះ​នោះ​ហើយ ដែល​សម្តេច ​ហេង សំរិន បាន​ប្រកាស​ផែន​ការ ១១ ចំណុច ក្នុង​ការ​ផ្តួល​រំលំ​របប​ប្រល័យ​ពូជ​សាសន៍ ប៉ុល ពត ។

សៀវភៅ​ដដែល​នេះ បាន​សរសេរ​បន្ត​ឲ្យ​ដឹង​ដែរ​ថា សម្តេច ហេង សំរិន គឺ​ជា​ថ្នាក់​ដឹក​នាំ​ម្នាក់​ក្នុង​ចំណោម​ថ្នាក់​ដឹក​នាំ​ចលនា​រណ​សិរ្ស​សាមគ្គី​សង្គ្រោះ​ជាតិ​កម្ពុជា​ចំនួន ១៤រូប ដែល​នៅ​រស់​រាន​មាន​ជីវិត រួម​មាន​ដូច​ជា សម្តេច ​នាយក​រដ្ឋ​មន្រ្តី​ ហ៊ុន សែន ប្រធាន​គណបក្ស​ប្រជាជន​កម្ពុជា លោក​ស្រី​មែន សំអាន សមាជិក​គណៈ​កម្មាធិការ​អចិន្ត្រៃយ៍​នៃ​គណបក្ស​ប្រជាជន​កម្ពុជា និង​ជា​សមាជិកា​ព្រឹទ្ឋសភា លោករស់ សម័យ ទីប្រឹក្សា​ជាន់​ខ្ពស់​រាជ​រដ្ឋា​ភិបាល​និង លោកចាន់ វ៉ែន អតីត​អគ្គ​លេខា​ធិការ​រដ្ឋ​សភា​ជា​ដើម​។

សូម​បញ្ជាក់​ថា សៀវភៅ "ការ​តស៊ូ​របស់​ប្រជាជន៖ កម្ពុជា​រស់​ឡើង​វិញ “ ត្រូវ​បាន​រៀប​ចំ​បោះពុម្ព​ផ្សាយ​ដោ​យក្រុម​ហ៊ុន EDM Books នៅ​ប្រទេស​សិង្ហ​បូរី និង​ធ្វើ​ការ​ចែក​ផ្សាយ​នៅ​កម្ពុជា​ដោយ​បណ្ណាគារ Monuments Books ។ សៀវភៅ​ថ្មី​នេះ​ក៏​នឹង​អាច​រក​ទិញ​បាន​ផង​ដែរ​នៅ​តាម​វេប​សាយ Amazon.com នា​ដើម ឆ្នាំ ២០១៩​៕ (អត្ថបទដោយ ទេព វណ្ណះ)