ខេត្តបាត់ដំបង៖ សេចក្ដីរាយការណ៍បឋមបានឱ្យដឹងថា ជនសង្ស័យចំនួន២នាក់ ត្រូវបានប្រជាពលរដ្ឋចាប់ខ្លួនប្រគល់ឱ្យសមត្ថកិច្ច កាលពីវេលាម៉ោង៧ និង៣០ព្រឹកថ្ងៃ០៧ វិច្ឆិកា ខណៈដែលជនទាំង២នាក់នេះ ជិះម៉ូតូទៅឈប់ខាងមុខផ្សារមួយកន្លែង ក្នុងឃុំព្រៃស្វាយ ស្រុកមោងឫស្សី ក្នុងគោលបំណងធ្វើសកម្មភាពកាច់សោ.កលួចយកម៉ូតូ ។
សេចក្តីរាយការណ៍បន្តថា ជនសង្ស័យទាំង២នាក់ ម្នាក់ឈ្មោះសរ សុខុម ភេទប្រុស អាយុ៣៨ឆ្នាំ មុខមិនពិតប្រាកដ រស់នៅភូមិទន្លេនាម ឃំុញ៉ាញ់ ស្រុកត្រាំកក់ ខេត្តតាកែវ និងម្នាក់ទៀតឈ្មោះយន់ ដា ភេទប្រុស អាយុ៣៨ឆ្នាំ មុខរបរមិនពិតប្រាកដ រស់នៅភូមិប្រជ្រាយ ឃំុអង្គប្រាសាទ ស្រុកគីរីវង់ ខេត្តតាកែវ ។
បើតាមសមត្ថកិច្ចបានឲ្យដឹងថា ជនទាំង២នាក់នេះ ជាមុខសញ្ញាធ្លាប់ធ្វើសកម្មភាពកាច់សោ.កលួចយកម៉ូតូអស់ជាច្រើនគ្រឿង នៅស្រុកមោងប្ញស្សី និងនៅកន្លែងដទៃទៀតរ ហូតត្រូវពលរដ្ឋចំណាំមុខ ទើបមកលើកនេះត្រូវពលរដ្ឋព័ទ្ធចាប់ប្រគល់ឲ្យសមត្ថកិច្ចតែម្ដង។
ជាមួយនឹងការព័ទ្ធចាប់ខ្លួនជនទាំង២នាក់នេះ សមត្ថកិច្ចបានឆែករកឃើញដែករាងអក្សរTមួយដើម ដែលជននេះ លាក់ជាប់ខ្លួន ដែលសម្រាប់កាច់សោ.កម៉ូតូ ម៉ូតូម្រាប់ជិះធ្វើសកម្មភាព១គ្រឿងម៉ាកហុងដាឌ្រីម សេ១២៥ ពណ៌ខ្មៅ ស៊េរី២០១៧ ពាក់ផ្លាកលេខភ្នំពេញ1GV-4783 និងស្លាកលេខ០១ទៀតភ្នំពេញ1-HE 8805 ដែលទុកក្នុងកាបូប ។
ពេលនេះ មន្ត្រីជំនាញកំពុងសួរនាំជនសង្ស័យទាំង២នាក់ នៅអធិការដ្ឋាននគរបាលស្រុកមោងប្ញស្សី ។
