ភ្នំពេញ៖ នៅថ្ងៃទី០៥ ខែវិច្ឆិកា នេះ ប្រមុខរដ្ឋាភិបាលកម្ពុជា បានបង្ហាញការព្រួយបារម្ភពីឱសថក្លែងក្លាយ និងគ្មានគុណភាព ដែលកំពុងរីករាលដាល។ សម្តេចតេជោ ហ៊ុន សែន ចាត់ទុកថា ឱសថក្លែងក្លាយ និងអន់គុណភាព ថាបានបង្ករគ្រោះថ្នាក់ដល់សុខភាព និងសុវត្ថិភាពសង្គម។
នៅក្នុងឱកាសបើកសន្និសីទអន្តរជាតិ ស្តីពីការប្រយុទ្ធប្រឆាំងឱសថក្លែងក្លាយ និងអន់គុណភាព នៅថ្ងៃទី៥ ខែ វិច្ឆិកា សម្តេច ហ៊ុន សែន បានថ្លែងថា ឱសថត្រូវបានចាត់ទុកជាផ្នែកសំខាន់មួយនៃប្រព័ន្ធការពារ និងព្យាបាលសុខភាពប្រជាជន ដែលមិនអាចខ្វះបាន ប៉ុន្តែមានឱសថក្លែងក្លាយ និងអន់គុណភាពបានបង្កគ្រោះថ្នាក់ដល់សុខភាព និងសុវត្ថិភាពសង្គម និងធ្វើឲ្យរាំងស្ទះដល់កំណើនសេដ្ឋកិច្ចជាតិ។
សម្តេច នាយករដ្ឋមន្ត្រីបន្តថា បច្ចុប្បន្នបញ្ហាឱសថក្លែងក្លាយ និងអន់គុណភាពកំពុងរីករាលដាលគួរឲ្យព្រួយបារម្ភ។ ក្នុងនោះផលិតផលឱសថមួយចំនួនកំពុងធ្វើអាជីវកម្មតាមប្រព័ន្ធអនឡាញ ដែលជាឱសថគ្មានប្រភពច្បាស់លាស់ក្លែងក្លាយ ហើយស្រដៀងនឹងឱសថពិត ធ្វើឲ្យអាជ្ញាធរពិបាកគ្រប់គ្រង។
យោងតាមការសិក្សាស្រាវជា្រវរបស់អង្គការសុខភាពពិភពលោក កាលពីឆ្នាំ២០១៧ ផលិតផលឱសថមួយ ក្នុងចំណោម១០ប្រភេទពីប្រទេស ដែលមានប្រាក់ចំណូលទាប និងមធ្យម គឺជាឱសថក្លែងបន្លំ ឬគ្មានគុណភាពតាមស្តង់ដា។ អង្គការសុខភាពពិភពលោកបញ្ជាក់ថា ការប្រើប្រាស់ឱសថក្លែងក្លាយមិនត្រឹមតែខាតបង់ថវិកាទេ ប៉ុន្តែគុណភាពឱសថទាំងនោះ អាចធ្វើឲ្យស្ថានភាពជំងឺធ្ងន់ធ្ងរ ឬឈានដល់ការបាត់បង់ជីវិតទៀតផង។
ដើម្បីទប់ស្កាត់ឱសថក្លែងក្លាយ ប្រមុខរដ្ឋាភិបាលកម្ពុជាបានស្នើឲ្យចាត់វិធានការនានា ដូចជាការរៀបចំពង្រឹងវិធានច្បាប់, ត្រូវផ្ដន្ទារទោសយ៉ាងតឹងរឹងចំពោះជនល្មើស, ប្រទេសនីមួយៗគួរបង្កើតក្រុមជំនាញពាក់ព័ន្ធការងារប្រយុទ្ធប្រឆាំងនឹងបទល្មើស, បង្កើនកិច្ចសហការរវាងអាជ្ញាធរគ្រប់លំដាប់ថ្នាក់នៅតាមព្រំដែនក្នុងការបង្រ្កាប, និងបង្កើនកិច្ចសហប្រតិបត្តិការរវាងស្ថាប័នរដ្ឋនិងអ្នកផលិតឱសថ។
សម្តេច ហ៊ុន សែន ក៏ចង់ឲ្យមានការផ្តើមចេញពីទីក្រុងភ្នំពេញនូវការជជែកពីបញ្ហាឱសថក្លែងក្លាយ ដាក់ចូលទៅក្នុងក្របខ័ណ្ឌអាស៊ាន, កិច្ចប្រជុំនៃបណ្តាប្រទេសមេគង្គ, កិច្ចប្រជុំអាស៊ីបូព៌ា, និងកិច្ចប្រជុំអាសុី-អឺរ៉ុប ដែលគ្រោងធ្វើនៅក្នុងប្រទេសកម្ពុជានាឆ្នាំ២០២០ខាងមុខនេះ ដែលកម្ពុជាធ្វើជាម្ចាស់ផ្ទះ។