ក្នុងជំនួបនោះ ឧបនាយករដ្ឋមន្រី្ត បានសម្តែងការអបអរសាទរចំពោះលោក តាហា ម៉ាកភៀសុន ដែលបានទទួលការតែងតាំង និងបានថ្វាយសារតាំងជាឯកអគ្គរដ្ឋទូតប្រចាំកម្ពុជា កាលពីថ្ងៃទី១១ ខែកក្កដា ឆ្នាំ២០១៨ កន្លងទៅនេះ។
ក្រៅពីទំនាក់ទំនងទ្វេភាគី ឧបនាយករដ្ឋមន្រី្ត និងឯកអគ្គរដ្ឋទូត ណូវែលហ្សេឡង់ បានផ្លាស់ប្តូរយោបល់គ្នា អំពីការជំរុញកិច្ចសហប្រតិបតិ្តការជាដៃគូ យុទ្ធសាស្រ្តអាស៊ាន-ណូវែលហ្សេឡង់ ក្នុងខណៈដែលកម្ពុជា ទទួលតួនាទីជាប្រទេសសម្របសម្រួល ទំនាក់ទំនងដៃគូសន្ទនារវាងអាស៊ាន-ណូវែលហ្សេឡង់ ឆ្នាំ២០១៨-២០២១។
ឥស្សរជនទាំងពីរ ក៏បានពិភាក្សាផងដែរ អំពីស្ថានការណ៍នយោបាយ និងសេដ្ឋកិច្ចពិភពលោក ដែលបច្ចុប្បន្នកំពុងមានភាពស្មុគ្រស្មាញ និងប្រែប្រួលឆាប់រហ័ស ព្រមទាំងបញ្ហាមួយចំនួនក្នុងតំបន់ ដែលមានដូចជាការវិវត្តជាវិជ្ជមាននៅឧបទ្វីបកូរ៉េ និងគំនិតផ្តួចផ្តើមនិម្មាបនកម្មតំបន់។
លោកឯកអគ្គរដ្ឋទូត ណូវែលហ្សេឡង់ ថ្លែងអំណរគុណចំពោះការពន្យល់បំភ្លឺនេះ និងបានបញ្ជាក់ថា ទោះបីជាប្រទេសទាំងពីរមានជំហរខុសគ្នាខ្លះទាក់ទងនឹង ស្ថានការណ៍នយោបាយ ក៏ប៉ុន្តែកម្ពុជា និងណូវែលហ្សេឡង់ នៅមានផលប្រយោន៍ និងកិច្ចសហប្រតិបត្តិការធំៗជាមួយគ្នាផ្សេងទៀត ដូចជាកិច្ចសហប្រតិបត្តិការក្នុងវិស័យអប់រំ កសិកម្ម ពាណិជ្ជកម្ម ដែលលោកឯកអគ្គរដ្ឋទូត បានប្តេជ្ញាថានឹងបន្តខិតខំជំរុញឲ្យកាន់តែមានការរីកចម្រើនទៅមុខថែមទៀត។
លោកឧបនាយករដ្ឋមន្រ្តី និងលោកឯកអគ្គរដ្ឋទូត បានឯកភាពគ្នាថា នឹងប្រគល់ភារកិច្ចជូនមន្ត្រីពាក់ព័ន្ធបន្តពិភាក្សាគ្នានៅថ្ងៃមុខទៀត ដើម្បីរិះរកវិធីធ្វើយ៉ាងណាជំរុញកិច្ចសហ-ប្រតិបត្តិការ ឲ្យកាន់តែមានការរីកចម្រើនថែមទៀត។
កិច្ចពិភាក្សា បានបញ្ចប់ក្នុងបរិយាកាសរីករាយ និងស្និទ្ធស្នាល៕
