ជនរងគ្រោះទាំងពីរនាក់បងប្អូនមានឈ្មោះ ទី១ អ៊ុល លក្ខណា អាយុ១៤ឆ្នាំ និងទី២ ឈ្មោះ អ៊ុល ធីតា អាយុ៧ឆ្នាំ ចំណែកឪពុកទៅធ្វើការនៅឯប្រទេសថៃ និងម្ដាយធ្វើការជាកម្មកររោងចក្រនៅទីក្រុងភ្នំពេញ ។
តាមសម្ដីឪពុកមារបស់ជនរងគ្រោះបានឱ្យដឹងថា ជាធម្មតាក្មេងស្រីទាំងពីរ ជារៀងរាល់ព្រឹកតែងតែទៅផ្ទះរបស់គាត់ ហូបបាយហូបទឹក និងយកគោទៅចងឱ្យ ស៊ីស្មៅជាធម្មតា ចំឡែកព្រឹកថ្ងៃកើត ហេតុ មិនបានឃើញក្មេងស្រីទាំងពីរនោក់នោះ សាច់ញាតិក៏បាននំាគ្នា ដើររកគ្រប់ទីកន្លែង តែរកមិនឃើញ លុះនៅវេលាម៉ោង ១១ និង ៣០នាទី ថ្ងៃត្រង់ គាត់ (ឪពុកមា) ក៏បានឡើងទៅផ្ទះរបស់ក្មួយ ក៏ប្រទះឃើញសពទាំងពីរនាក់បងប្អូនដេកស្លាប់នៅក្នុងកេសដាក់ខោអាវ ដែលមើលទៅពិតជាគួរឱ្យសង្វេគជាទីបំផុត ។
ក្រោយមក គាត់ក៏បានយកសពក្មួយចេញពីកេសនោះ ហើយប្តឹងដល់សមត្ថកិច្ច ចុះមកដល់កន្លែងកើតហេតុតែម្តង ។ ក្រោយការពិនិត្យកោសល្យវិច្ច័យ សមត្ថកិច្ចបញ្ជាក់ថា សពពិតជាត្រូវបានឃាតក សម្លាប់ និងយកទៅដាក់ក្នុង កេសដាក់ខោអាវ ពិតប្រាកដមែន។
ក្រោយរកឃើញសាកសពជនរងគ្រោះទាំងពីរនាក់ សមត្ថកិច្ចជំនាញ កំពុងធ្វើការស្រាវជ្រាវយ៉ាងយកចិត្តទុកដាក់ ដើម្បីតាមប្រមាញ់ឃាតកយកមកផ្ដន្ទាទោសតាមច្បាប់ ចំណែកសពត្រូវបានប្រគល់ឱ្យក្រុមគ្រួសារធ្វើបុណ្យតាមប្រពៃណី ៕ (អត្ថបទដោយ ទេព វណ្ណះ)
