លោកស្រី ប៊ុន ចាន់តារារ័ត្ន ប្រធានទីផ្សាររបស់ Toyota ប្រចាំកម្ពុជាបានឲ្យដឹងថា ក្រុមហ៊ុនបានសម្រេចមិនរៀបចំការប្រកួតពានរង្វាន់TMCC ឆ្នាំ២០១៨នេះទេដោយសារមើលឃើញថា កាលវិភាគប្រកួតរបស់លីគក្នុងស្រុក និងតំបន់មានការមមាញឹកខ្លាំង។ ទោះជាយ៉ាងណា ការអភិវឌ្ឍកីឡា ជាពិសេសបាល់ទាត់ក្នុងតំបន់នៅតែបន្ត។
តំណាងក្រុមហ៊ុនរូបនេះបញ្ជាក់ថា ៖«យើងនៅតែបន្តកិច្ចការអភិវឌ្ឍកុមារ និងរៀបចំ CSR football clinics ដើម្បីឱកាសដល់យុវជនអភិវឌ្ឍជំនាញរបស់ពួកគេ។ យើងកំពុងវាយតម្លៃអំពីការខិតខំប្រឹងប្រែងរបស់យើងក្នុងតំបន់ ហើយយើងកំពុងសិក្សាអំពីលទ្ធភាពនៃការពង្រីក CSR football clinics បន្ថែមទៀត»។
ពានរង្វាន់ TMCC ត្រូវបានរៀបចំឡើង៤រដូវកាលហើយគិតតាំងពីឆ្នាំ២០១៤មក ប៉ុន្តែរដូវកាល២០១៨នេះត្រូវបានផ្អាកវិញ។ រយៈពេល៤រដូវកាលក្រុមខ្លាំងរបស់ថៃ Burriram United ឈ្នះបាន៣ដងគឺឆ្នាំ២០១៥ ២០១៦ និង២០១៧ ខណៈឆ្នាំដំបូង២០១៤បានទៅក្រុមវៀតណាម Becamex Binh Duong៕
