ក្រុមហ៊ុនវិភាគទីផ្សារ Goldman Sachs បានចេញផ្សាយរបាយការណ៍ថ្មីនិយាយពីឥទ្ធិពលនៃការប្រកាសចេញ iPhone ជំនាន់ថ្មី កើតមានលើក្រុមហ៊ុន Apple នៅសប្ដាហ៍ក្រោយនេះ។
ក្រុមហ៊ុនខាងលើបានព្យាករណ៍ថាតម្លៃក្នុងមួយហ៊ុនរបស់ Apple នឹងឡើងដល់ ២៤០ ដុល្លារ ខុសពីការព្យាករណ៍លើកមុនដែលថានឹងមានតម្លៃ ២០០ ដុល្លារ។ ការដំឡើងតម្លៃនេះក្រោយពី Goldman Sachs ដឹងថាខ្លួនបានធ្វើការព្យាករណ៍ខុសលើ iPhone X។
Goldman បានបកស្រាយដូចនេះថា៖ "យើងរំពឹងថា iPhone X នឹងមានតម្រូវការមិនល្អលើទីផ្សារ ដែលនឹងបន្ទាបតម្លៃហ៊ុន ជាលទ្ធផលការរំពឹងទុកពីរនេះមិនបានកើតឡើងឡើយ”។
ដោយឃើញថា iPhone X មានតម្រូវការខ្ពស់ Goldman Sachs បង្ហាញក្ដីរំពឹងថា Apple នឹងមិនចាប់យកទីផ្សារស្មាតហ្វូនតម្លៃថោកជាមួយ iPhone អេក្រង់ LCD ដែលប្រកាសចេញសប្ដាហ៍ក្រោយនេះទេ។ ផ្ទុយទៅវិញគេរំពឹងថា iPhone អេក្រង់ LCD នឹងមានតម្លៃចាប់ពី ៨៤៩ ដុល្លារ ធៀបនឹងតម្លៃ ៦៩៩ ដុល្លារ ដែលអ្នកជំនាញជាច្រើនទៀតបានរំពឹងទុក។
បើដូចនេះមែន iPhone Xs ដែលមានអេក្រង់ទំហំ ៥,៨ អ៊ីញ អាចនឹងមានតម្លៃចាប់ពី ៩៤៩ ទៅ ៩៩៩ ដុល្លារ និង iPhone Xs Max អាចនឹងមានតម្លៃលើសនេះ៕
ប្រភព៖
9to5Mac
