សហរដ្ឋអាមេរិក និងតួកគីមានជំហររួមគ្នា ដោយប្រឆាំង​គម្រោងវាយដណ្តើមខេត្ត Idlib ដោយ​កងទ័ពរដ្ឋាភិបាល​ស៊ីរី! - សមាគម វិទ្យុ​ និងទូរទស្សន៍សំលេងជនពិការភ្នែក (VOB)

Mobile Menu

Top Ads

ចន្លោះទំនេរ សម្រាប់ដាក់ពាណិជ្ជកម្ម

អត្ថបទ និងព័ត៌មានថ្មីៗ

logoblog

សហរដ្ឋអាមេរិក និងតួកគីមានជំហររួមគ្នា ដោយប្រឆាំង​គម្រោងវាយដណ្តើមខេត្ត Idlib ដោយ​កងទ័ពរដ្ឋាភិបាល​ស៊ីរី!

05/09/2018
(វ៉ាស៊ីនតោន)៖ រដ្ឋមន្រ្តីការបរទេស​អាមេរិកលោក ម៉ៃក៍ ប៉ុមប៉េអូ (Mike Pompeo) ក្នុងឱកាសពិភាក្សា​តាមទូរស័ព្ទ​ជាមួយ​​សមភាគីតួកគីលោក ម៉េវលុត លាវូសូគ្លូ (Mevlut Cavusoglu) បានឯកភាពគ្នាថា គម្រោងវាយ​ប្រហារ​របស់រដ្ឋាភិបាល​ស៊ីរីទៅលើ​ខេត្ត អ៊ីដលីប (Idlib) ដែលកាន់កាប់​ដោយ​​ក្រុមឧទ្ទាម គឺនឹង​មិន​អាចទទួល​យកបានជា​ដាច់ខាត។ នេះបើតាមការ​ដកស្រង់ការផ្សាយចេញ​ពីទីភ្នាក់ងារព័ត៌មានចិន ស៊ីនហួរ នៅព្រឹក​ថ្ងៃពុធ ទី០៥ ខែកញ្ញា ឆ្នាំ២០១៨។
យោងតាមសេចក្តីថ្លែងការណ៍​ដែលធ្វើឡើង​ដោយ អ្នកនាំពាក្យក្រសួង​ការបរទេស​អាមេរិក ​លោក Pompeo និង លោក Cavusoglu បាន​យល់​ស្របថា ការវាយប្រហារ​ណាមួយ ពីសំណាក់កងទ័ព​រដ្ឋាភិបាល​ស៊ីរី នៅខេត្ត Idlib នឹងក្លាយជាទង្វើ​ដែលទាំងអាមេរិក និង​តួកគី ពុំអាចទទួល​យកបាននោះ​ឡើយ ហើយទង្វើ​បែបនេះ​ក៏អាចចាត់ទុកថា ជាការបង្កើនភាព​តានតឹងនៃជម្លោះ​ ឲ្យកាន់តែខ្លាំង​ថែម​ទៀត​ផងដែរ។
គួរជម្រាបថា កាលពីដើមសប្តាហ៍នេះ​ប្រធានាធិបតីអាមេរិក​លោក ដូណាល់ ត្រាំ បានព្រមានរុស្ស៊ីនិងអ៊ីរ៉ង់ ដែល​ជាសម្ព័ន្ធ​មិត្ត​របស់​ទីក្រុង​ដាម៉ាស់ មិនឲ្យ​ចូល​រួម​ក្នុងការ​វាយ​ប្រហារនោះឡើយ បើមិនចង់ស្តាយក្រោយចំពោះកំហុសរបស់ខ្លួន ដោយ​សារ​តែ​មនុស្ស​រាប់​ម៉ឺន​នាក់​អាចនឹងបាត់បង់ជីវិត។ ជាការឆ្លើយតប វិមានក្រឹមឡាំង​បានលើកឡើងថា ការព្រមាន​របស់លោក ត្រាំ មិនឲ្យស៊ីរីវាយប្រហារ​​ខេត្តដែល​កាន់កាប់ដោយក្រុម​ឧទ្ទាមនេះ គឺជាការមិនខ្វាយខ្វល់​អំពីគ្រោះថ្នាក់​ ដែលបង្កឡើងដោយ​ក្រុមភេរវករ​នៅទីនោះ។
ចាប់តាំងពីដើម​ឆ្នាំនេះមក ក្រុមឧទ្ទាមស៊ីរី​ត្រូវបាន​កងកម្លាំង​រដ្ឋាភិបាល វាយបណ្តេញ​ចេញពីតំបន់​សំខាន់ៗ​ក្នុងរដ្ឋធានីដាម៉ាស់ ព្រម​ទាំង​ខេត្ត ហូមស៍ (Homs) ភាគកណ្តាល និងតំបន់ភាគខាងត្បូង​ ហើយនៅប៉ុន្មានសប្តាហ៍ចុងក្រោយនេះ កងទ័ពស៊ីរី បាននិងកំពុងតែ​ប្រមូល​កម្លាំង​ទៅ​ដាក់ពង្រាយនៅជុំវិញ​​ខេត្ត Idlib ខណៈសមរភូមិ​កម្ចាត់ក្រុមឧទ្ទាម​ដ៏ធំចុងក្រោយនៅស៊ីរី ត្រូវគេរំពឹងថា​នឹងផ្ទុះឡើង​នាពេល​ឆាប់ៗ​ខាងមុខ៕