Apple រំពឹង​មាន MacBook Air ស៊េរី​ថ្មី ក្រោយ​ខកខាន​ដាក់​ប្រកាស​ជាង ៣ ឆ្នាំ

យោង​តាម​ក្រុម​ស្រាវជ្រាវ TrendForce បាន​ឲ្យ​ដឹង​ថា​ក្រុមហ៊ុន Apple រំពឹង​នឹង​ចេញ​ផ្សាយ​កុំព្យូទ័រ MacBook Air សេរ៊ី​ថ្មី​នា​ចុង​ត្រីមាស​ទី ៣ អំឡុង​ខែ​កញ្ញា​ឬ​តុលា ឆ្នាំ ២០១៨ នេះ។
ដោយ​គ្មាន​ការ​បង្ហើប​ច្បាស់​ពី​ព័ត៌មាន​លំអិត​ទាក់ទង​នឹង​លក្ខណៈ​សម្បត្តិ​ម៉ាស៊ីន ចចាមអារ៉ាម​នេះ​ ក៏​ស្រដៀង​នឹង​ការ​លើក​ឡើង​របស់​អ្នក​វិភាគ​លោក Ming-Chi Kuo ក៏​ដូច​ជា​អ្នក​រាយការណ៍​ឲ្យ Bloomberg លោក Mark Gurman ធ្លាប់​ប៉ាន់ប្រមាណ​ប្រហែល​គ្នា​ពី​ការ​ត្រៀម​ដាក់​បង្ហាញ​ប្រភេទ Notebook ធុន​ធម្មតា​នា​ចុង​ឆ្នាំ ​គ្រាន់​ពុំ​បញ្ជាក់​ថា​ជា​ត្រកូល Pro ឬ Air។

តាម​ការ​រំពឹង​ទុក​ អាច​ជា​ MacBook Air រចនា​ថ្មី​អេក្រង់ ១៣ អ៊ីញ ក្រោយ​ខាន​ដាក់​បង្ហាញ​តាំង​ពី​ឆ្នាំ ២០១៥ ជាមួយ​តម្លៃ​ត្រឹម ៩៩៩ ដុល្លារ​ ឬ​អាច​ទាប​ជាង​នេះ​ សម្រាប់​ទីផ្សារ​សហរដ្ឋអាមេរិក បន្ទាប់​ពី​ក្រុមហ៊ុន​លោក Tim Cook ប្រកាស​បញ្ឈប់​ចង្វាក់​ផលិតកម្ម​អេក្រង់ ១១ អ៊ីញ​នា​ពេល​កន្លង​មក។

យ៉ាងណាមិញ​ ភាគរយ​ច្រើន​អាច​ពន្យារ​ដល់​ខែ​តុលា ព្រោះ​ខែ​កញ្ញា​ជា​ព្រឹត្តិការណ៍​ធំ​របស់ Apple រំពឹង​ចេញ​ផ្សាយ iPhone ថ្មី​ដល់​ទៅ ៣ ម៉ូឌែល គួប​ផ្សំ Apple Watch Series 4 ក៏​ដូច​ជា​កាស AirPods សេរ៊ី​ឆ្នាំ ២០១៨៕




ប្រភព៖ macrumors