ក្នុងលិខិតនោះរដ្ឋមន្ត្រីការបរទេសហ្វីលីពីន បានគូសបញ្ជាក់យ៉ាងដូច្នេះ «ក្នុងនាមឯកឧត្តមប្រធានាធិបតី រូឌ្រីហ្គោ ឌូតឹតេ និងប្រជាជនហ្វីលីពីន ខ្ញុំសូមអបអរសាទររដ្ឋាភិបាល និងប្រជាជនកម្ពុជាចំពោះការបោះឆ្នោតនាពេលថ្មីៗនេះ ដែលបានប្រព្រឹត្តទៅប្រកបដោយសន្តិភាព និងមានសណ្តាប់ធ្នាប់»។
ក្នុងលិខិតនោះរដ្ឋមន្រ្តីការបរទេសហ្វីលីពីន ក៏បានបញ្ជាក់ដែរថា ហ្វីលីពីននៅតែប្តេជ្ញាចិត្តធ្វើការជាមួយកម្ពុជា ដើម្បីពង្រឹងបន្ថែមទៀតនូវទំនាក់ទំនងជាមិត្តភាព និងការពង្រឹងកិច្ចសហប្រតិបត្តិការក្នុងកម្រិតទ្វេភាគី តំបន់ និងអន្តរជាតិ។
សូមបញ្ជាក់ថា ហ្វីលីពីនជាប្រទេសសមាជិកអាស៊ានទី៣ហើយ ដែលបានប្រកាសគាំទ្រការដំណើរការបោះឆ្នោតនៅកម្ពុជាបន្ទាប់ពីប្រទេសឡាវ និងវៀតណាម។ ក្រៅពីប្រទេសសមាជិកអាស៊ានទាំង៣នេះ ប្រទេសចិន និងអង្គការអន្តរជាតិមួយចំនួនទៀត ក៏បានប្រកាសគាំទ្រដំណើរការបោះឆ្នោតនៅកម្ពុជាផងដែរ។
សំឡេងឆ្នោតនេះ គណបក្សប្រជាជនកម្ពុជាទទួលបានច្រើនជាងគេ គឺមានចំនួនរហូតដល់ទៅ ៤,៨៧៥,១៨៩នាក់ ស្មើនឹង ៧៦.៧៨ភាគរយ។ តាមរយៈសំឡេងឆ្នោតនេះ បើគេគណនារកចំនួនអាសនៈតាមរូបមន្តក្នុងច្បាប់ស្តីពីការបោះឆ្នោតជ្រើសតាំងតំណាងរាស្ត្រ គឺគណបក្សប្រជាជនអាចគ្រប់គ្រងអាសនៈនៅក្នុងរដ្ឋសភាទាំង ១២៥តែម្តង៕
