ខេត្តបាត់ដំបង៖ មន្ត្រីជំនាញដែលកំពុងតាមដានកម្ពស់ទឹកស្ទឹងសង្កែបានឱ្យដឹងថា គិតត្រឹមម៉ោង៤រសៀលថ្ងៃទី១៦ កក្កដា នេះ កម្ពស់ទឹកស្ទឹងសង្កែបានឡើងដល់ជិត១៣ម៉ែត្រហើយ ហើយក៏មិនទាន់មានសញ្ញាណាមួយដែលអាចថមថយដែរ ខណ:ភ្លៀងនៅតែធ្លាក់ស្ទើរគ្រប់ទីកន្លែង ។ ជាពិសេស នៅប៉ែកខាងលើ នៃដងស្ទឹង។
មន្ត្រីជំនាញបានឱ្យដឹងទៀតថា បើតាមការពិនិត្យជាក់ស្ដែង នៅម៉ោង៤រសៀលនេះ កម្ពស់ទឹកស្ទឹងសង្កែបានដល់ជិត១៣ម៉ែត្រ ដែលអាចជាកំរិតមួយឈានដល់ការប្រកាសអាសន្នហើយ សម្រាប់ប្រជាពលរដ្ឋដែលរស់នៅតាមដងស្ទឹងសង្កែ ។
មន្ត្រីដដែលនិយាយថា ភ្លៀងបានធ្លាក់ខ្លាំង កាលពីម្សិលមិញនៅប៉ែកខាងលើ ទើបធ្វើឱ្យទឹកស្ទឹងឡើងកាន់តែខ្លាំងថែមទៀត ខណ:កាលពីថ្ងៃមុនបានស្រកខ្លះទៅហើយ ។ មន្ត្រីជំនាញបានអំពាវនាវដល់ប្រជាពលរដ្ឋ ត្រូវមានការប្រុងប្រយ័ត្នចំពោះការវិវឌ្ឍន៍នៃជំនន់ទឹកភ្លៀង ក្នុងស្ទឹងសង្កែនាពេលនេះ ។ ជាពិសេសប្រជាពលរដ្ឋដែលរស់នៅតាមដងស្ទឹងសង្កែ ព្រោះភ្លៀងអាចនៅមានបន្តទៀត ។
ក្រសួងធនធានទឹកនិងឧតុនិយម បានចេញសេចក្ដីជួនដំណឹងកាលពីប៉ុន្មានថ្ងៃមុននេះថា សម្ពាធទឹកនឹងគ្របដណ្ដប់ស្ទើរគ្រប់ទីកន្លែងនៃប្រទេស ចាប់ពីថ្ងៃទី១៤ ដល់១៨ កក្កដា ហើយនឹងមានភ្លៀងធ្លាក់រាយប៉ាយពីមធ្យមទៅខ្លាំង ហើយខេត្តបាត់ដំបងក៏ទទូលរងនូវសម្ពាធនេះដែរ។
ទោះយ៉ាងណា មិនទាន់មានព័ត៌មានពីអាជ្ញាធរស្ដីពីផលប៉ះពាល់ ដោយជំនន់ទឹកស្ទឹងនេះនៅឡើយទេ រហូតមកដល់ពេលនេះ ។ ប៉ុន្តែអាជ្ញាធរ និងមន្ត្រីនៃមន្ទីជំនាញ កំពុងតាមដានការវិវឌ្ឍន៍នៃជំនន់ទឹកស្ទឹងនេះជាប្រចាំផងដែរ ។