ដូណាល់ ត្រាំ ទុកយើងជាសត្រូវទៅហើយ ដូច្នេះយើងកុំពឹងផ្អែកទាំងស្រុងលើអាមេរិកទៀត, នេះបើតាមសម្តីនៃមន្ត្រីជាន់ខ្ពស់អាល្លឺម៉ង់!
16/07/2018
(ប៊ែរឡាំង)៖ រដ្ឋមន្រ្តីការបរទេសអាល្លឺម៉ង់បានសង្កត់ធ្ងន់ៗថា «យើងលែងអាចពឹងផ្អែកទាំងស្រុងលើសេតវិមានទៀតហើយ» ដោយការលើកឡើងនេះ បានកើតមានបន្ទាប់ពីប្រធានាធិបតីអាមេរិក លោក ដូណាល់ ត្រាំ បានព្រលយពាក្យសម្តីថា សហភាពអឺរ៉ុបត្រូវលោកចាត់ទុកថា «ជាសត្រូវ»។ នេះបើតាមការដកស្រង់ការផ្សាយចេញពី សារព័ត៌មានរុស្ស៊ី Sputnik នៅល្ងាចថ្ងៃចន្ទ ទី១៦ ខែកក្កដា ឆ្នាំ២០១៨។
ប្រមុខការទូតអាល្លឺម៉ង់លោក ហៃកូ ម៉ាអាស (Heiko Maas) បានលើកឡើងក្នុងបទសម្ភាសន៍មួយថា «ដើម្បីរក្សាភាពជាដៃគូជាមួយសហរដ្ឋអាមេរិក យើងត្រូវតែធ្វើការសម្របសម្រួលវាឡើងវិញ ដោយយើងមិនអាចពឹងផ្អែកទាំងស្រុងលើសេតវិមានតទៀតឡើយ ផ្ទុយទៅវិញជាដំបូង ពួកយើងត្រូវសាមគ្គីគ្នាឲ្យកាន់តែជិតស្និទ្ធ នៅក្នុងតំបន់អឺរ៉ុបផ្ទាល់តែម្តង»។ លោក Maas បានបញ្ជាក់ថា អឺរ៉ុបមិនគួរបណ្តោយឲ្យមានការប្រេះឆាគ្នានោះឡើយ ទោះបីជាមានការវាយប្រហារដោយពាក្យសម្តីធ្ងន់ធ្ងរយ៉ាងណាក្តី ពីប្រធានាធិបតីអាមេរិក។
គួរជម្រាបថា នៅក្នុងបទសម្ភាសន៍ជាមួយសារព័ត៌មាន CNS News លោក ត្រាំ បានចាត់ទុកប្លុកដែលមាន ២៨ប្រទេសនេះថា «ជាសត្រូវ» ជុំវិញបញ្ហាពាណិជ្ជកម្ម។ នាពេលកន្លងមកនេះ លោក ត្រាំ បានរិះគន់ជាច្រើនលើកច្រើនសាទៅលើសម្ព័ន្ធមិត្ត និងដៃគូអាមេរិក ចំពោះការយកពន្ធដែលលោកអះអាងថា គ្មានតម្លាភាពលើទំនិញអាមេរិក ហើយលោក ត្រាំ បានដាក់ចេញនូវការបង្កើនពន្ធកម្ពស់គឺដល់ទៅ២៥ភាគរយលើដែកថែប និង១០ភាគរយលើអាលុយមីញ៉ូម ដែលនាំចូលពីប្រទេសជាច្រើន រួមមានទាំងសមាជិកអឺរ៉ុប។
ជាការឆ្លើយតប សហភាពអឺរ៉ុប បានដំឡើងពន្ធវិញទៅលើទំនិញសំខាន់ៗរបស់អាមេរិក ដូចជាខោខូវប៊យ ម៉ូតូ ស្រាវីស្គី ជាដើម ដែលគិតជាតម្លៃសរុបស្មើនឹង ៣.៣ពាន់លានដុល្លារ៕
