កំលាំងPMចាប់ឈើប្រណិតក្បែរច្រមុះលោកនាយសង្កាត់រដ្ឋបាលព្រៃឈើអូរគ្រៀង!!!
22/06/2018
ក្រចេះ៖ ឈើប្រណិតប្រភេទលេខ១ប្រមាណ១០០កំណាត់ ត្រូវបានកំលាំងកងរាជអាវុធហត្ថរកឃើញនិងបង្ក្រាបបានដែលនៅមិនឆ្ងាយប៉ុន្មានពីទីស្នាក់ការរដ្ឋបាលព្រៃឈើអូរគ្រៀងរបស់លោក កែវ ចំណា ។
បើតាមសេចក្តីរាយការមកថា ប្រតិបត្តិការណ៍នេះធ្វើឡើងនៅថ្ងៃព្រហស្បតិ៍៩កើតខែបឋមាសាធ.ឆ្នាំច.សំរឹទ្ធិស័ក.ស.ព២៥៦២នាល្ងាចថ្ងៃទី២១ ខែមិថុនា,ឆ្នាំ២០១៨ ដោយកំលាំកងរាជអាវុធហត្ថ លើផ្ទៃប្រទេស សហការជាមួយកំលាំងកងរាជអាវុធហត្ថខេត្ដក្រចេះបានចុះបង្រាប គំនរឈើមួយកន្លែង ក្រោយពីទទួលបានព័ត៌មានថា មានការស្តុកឈើជាច្រើនប្រភេទ មានឈើលេខ១លាំងឃ្លុំ ជាច្រើនរាប់សឹបដុំ ស្ថិតនៅចំណុចភូមិ អូរព្រះ ឃុំ អូរគ្រៀង ស្រុកសំបូរ ខេត្ដក្រចេះ។
សេចក្តីរាយការណ៍បន្តទៀតថា ភ្លាមនោះដែរ លោក ហុង វិណុល មេបញ្ជាការរងកងរាជអាវុធហត្ថលើផ្ទៃប្រទេស បានដាក់បទបញ្ជាផ្ទាល់ អោយកំលាំងអាវុធហត្ថលើផ្ទៃប្រទេស និង កំលាំងអាវុធហត្ថខេត្ដ ក្រចេះ ឲ្យចុះធ្វើការបង្ក្រាបជាបន្ទាន់ ដោយដឹកនាំបញ្ជា ដោយលោក ចាន់ សុខខឿន និងដឹកនាំបញ្ជាចុះបង្ក្រាប ដោយលោក មុត វណ្ណៈ មេបញ្ជាការរងខេត្ដក្រចេះ និងលោកឡុង យឹង មេបញ្ជាការរងខេត្ដក្រចេះ បានធ្វើការទប់ស្កាត់បង្ក្រាបបាន ឈើប្រភេទលេខ១ចំនួន១០០ដុំ ដែលមានមុខកាត់ចាប់ពី៣០×៣៥ ប្រវ៉ែងចាប់ពី២,៥ម៉ែត្រកន្លះរហូតដល៤ម៉ែត្រ។
ក្រៅពីនេះបង្ក្រាបបានរថយន្ដសាំយ៉ុងមួយគ្រឿង ដឹកឈេីអាឆ្អឹនពេញរថយន្ដ បេីកយកទៅប្រគល់ជូន អោយជំនាញរដ្ឋបាលព្រៃឈើនៅជិតនោះផងដែរ ចំណែកគំនរឈើចំនួន១០០ដុំនោះព្រឹកថ្ងៃទី២២នេះទេីបយកឡានស្ទូច មកស្ទូចដឹកប្រគល់ជូនជំនាញតាមនិតិវិធីច្បាប់បន្តទៀត។
