ខេត្តកំពង់ស្ពឺ៖ ផលិតផលបរិភោគ ភាគច្រើនជាគ្រឿងផ្សំសម្រាប់ធ្វើសាច់ក្រក រួមមាន ពោះវៀនជ្រូក ពោះវៀនគោ ពោះវៀនមាន់ ទា ជាដើម ដែលស្តុបទុកជាច្រើនឆ្នាំ ត្រូវបានកម្ទេចចោលនៅចំពោះមុខអ្នកចូលរួមជាច្រើននាក់ នៅក្នុងខេត្តកំពង់ស្ពឺ។
លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ដែលដឹកនាំនៅក្នុងពិធីកំទេច ចំណីអាហារក្លែងក្លាយ ខូចគុណភាព និងខុសច្បាប់ទាំងនេះ បានចាត់ទុកថា ចំណីអាហារ ដែលមានសារធាតុគីមី ប៉ះពាល់សុខភាពជាង១០០តោននាពេលនេះ គឺជាការបង្ហាញឲ្យឃើញពីការយកចិត្តទុកដាក់ក្នុងការទប់ស្កាត់ និងបង្ក្រាបរបស់ភ្នាក់ងារមានសមត្ថកិច្ច ដែលដឹកនាំដោយ គណៈកមា្មធិការប្រយុទ្ធប្រឆាំងផលិតផលក្លែងកា្លយ។
លោក ស ខេង ថ្លែងបន្តថា កន្លងមកលោកធ្លាប់បានណែនាំឲ្យគណៈកម្មាធិការប្រយុទ្ធប្រឆាំងផលិតផលក្លែងក្លាយ យកចិត្តទុកដាក់ជាអាទិភាព ធ្វីការទប់ស្កាត់ និង បង្ក្រាបទៅលើផលិតផលទាំងឡាយណា ដែលមនុស្សទាំងអស់គ្នាហូបចូលទៅក្នុងពោះ មានដូចជា ថ្នាំពេទ្យ គ្រឿងឧបភោគ បរិភោគជាដើម។
លោកថា ផលិតផលចំណីអាហារខូចគុណភាព និងខុសច្បាប់ ដែលមានសារធាតុគីមី ប៉ះពាល់សុខភាព ជាង១០០តោននេះ គឺជាចំនួនដ៏ច្រើនសន្ធឹកសន្ធាប់ ប្រសិនបើទប់ស្កាត់មិនទាន់ពេលវេលានោះទេ ពិតជាត្រូវចែកចាយនៅលើទីផ្សារ ហើយអ្នកដែលរងគ្រោះច្បាស់ជាប្រជាពលរដ្ឋខ្មែរទាំងអស់គ្នា។
ជាមួយគ្នានេះ អ្នកតាមដានបញ្ហាសង្គមនានាបានសម្តែងការស្វាគមន៍ដល់ចំណាត់ការរបស់អាជ្ញាធរ ដែលបានបំផ្លាញចោលផលិតផលទាំងនេះ។ លោក សន ជ័យ នាយកប្រតិបត្តិសម្ព័ន្ធគណនេយ្យភាពសង្គមកម្ពុជា ថ្លែងថាការយកផលិតផលខុសច្បាប់ ហួសសុពលភាព ទៅកម្ទេចចោលជាច្រើនលើកនោះ នឹងមិនមានការថយចុះទេប្រសិនបើមិនមានវិធានការទប់ស្កាត់ជាមុន។
លោក សន ជ័យ និងអ្នកតាមដានសង្គមឯទៀត បានចោទសួរពីចំណាត់ការរបស់សមត្ថកិច្ចចំពោះការលួចផលិតគ្រឿងឧបភោគ បរិភោគ នានានៅក្នុងស្រុក និង ការធូររលុងនៃសមត្ថកិច្ចច្រកទ្វារព្រំដែន ដែលជាការសង្ស័យពាក់ព័ន្ធនឹងអំពើពុករលួយ ជាមូលហេតុនៃការហូរចូលទំនិញម្ហូបអាហារខូចគុណភាពពីប្រទេសជិតខាង។ ការអនុវត្តច្បាប់តឹងរឹងទៅលើអ្នកប្រព្រឹត្ត ក៏ជាចំណុចមួយសំខាន់ដែលត្រូវបានលើកឡើងផងដែរ។
ទោះយ៉ាងណា លោក ស ខេង នៅក្នុងពិធីថ្ងៃនេះ ក៏បានជំរុញដល់សមត្ថកិច្ចគ្រប់ជាន់ថ្នាក់ បន្តការខិតខំ ទប់ស្កាត់ និងបង្ក្រាបរាល់ផលិតផលក្លែងក្លាយ និងខូចគុណភាពឲ្យបានកខ្លាំងក្លាបន្ថែមទៀត ដើម្បីធានានូវសុខុមាលភាពរបស់ប្រជាពលរដ្ឋ ស្របតាមយុទ្ធសាស្ត្រចតុកោណដំណាក់កាលទី៣ របស់រាជរដ្ឋាភិបាលកម្ពុជា។