ខេត្តបន្ទាយមានជ័យ៖ រថយន្តធុនធំដឹកក្របីជាង ៤០ក្បាលដែលនាំចូលពីថៃដោយខុសច្បាប់មិនបង់ពន្ធគយ និងរដ្ឋករ ត្រូវបានកម្លាំងសមត្ថកិច្ចបង្ក្រាប កាលពីសៀល ថ្ងៃទី១២ ខែមិថុនា ឆ្នាំ២០១៨ម្សិលមិញនេះ ស្ថិតតាមផ្លូវជាតិលេខ៥ ក្នុងភូមិ-សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ។
ប្រភពពីមន្ត្រីគយ និងរដ្ឋករ នៃអគ្គនាយកដ្ឋានគយ និងរដ្ឋាករ ក្រសួងសេដ្ឋកិច្ច និងហិរញ្ញវត្ថុ បានប្រាប់ថា រថយន្តមួយគ្រឿង ម៉ាក់ហ៊ីណូ ពាក់ស្លាកលេខ ស្វាយរៀង 3A-0750 ដឹកសត្វក្របីជាង៤០ក្បាល ដែលនាំចូលពីប្រទេសថៃ ដោយគ្មានច្បាប់អនុញ្ញាត ដើម្បីនាំទៅលក់ខេត្តស្វាយរៀង ព្រំដែនប្រទេសវៀតណាមនោះ ត្រូវបានសមត្ថកិច្ចគយបង្ក្រាប។
មន្ត្រីរូបនោះបានបញ្ជាក់ថា ម្ចាស់រថយន្តដឹកសត្វក្របីនាំចូលពីថៃសត្វក្របីនេះ និយាយថាខ្លួនមិនដឹងក្រុមហ៊ុនមានឈ្មោះអី្វទេ គឺគាត់ស៊ីឈ្នួលបើករថយន្តឲ្យគេប៉ុណ្ណោះ។ រឿងមានច្បាប់ទម្លាប់បង់ពន្ធគយ ឬមិនបង់ពន្ធក៏មិនដឹងដែរ។ មន្ត្រីដដែលបន្តទៀតថា ចំពោះរថយន្តដឹកសត្វក្របីគ្មានច្បាប់នេះ បានយកទៅរក្សាទុកនៅសា្នក់ការគយ និងរដ្ឋករដើម្បីឲ្យបង់ពន្ធទើមអនុញ្ញាតឲ្យត្រឡប់ទៅវិញ។
សូមបញ្ជាក់ថា ករណីដឹកជញ្ជូនគោ ក្របី និងជ្រូកតាមច្រកព្រំដែនកម្ពុជា-ថៃ ក្នុងខេត្តបន្ទាយមានជ័យកើតមានយ៉ាងគគ្រឹកគ្រេងគ្មានការបង្ក្រាបឡើយ ដោយសារថៅកែធំដែលនាំសត្វទាំងនេះចូលមកកម្ពុជាបានឃុបឃិតបង់លុយជួនសមត្ថកិច្ចតាមបន្ទាត់ព្រំដែនគ្រប់ជំនាញ ជាពិសេសក្រុមមន្ត្រីគយ និងរដ្ឋរមិនអាចរំលងបានទេ ពុំដូច្នេះពិតជាត្រូវបង្ក្រាបជាមិនខាន។